இந்தியா - இலங்கை ஆகிய இரு அணிகளுக்கு இடையிலான 3 ஆட்டங்கள் கொண்ட டி20 தொடரில் குவாஹாட்டி ஆட்டம் மழையால் கைவிடப்பட்டது. இந்தூரில் நடைபெற்ற 2-வது டி20 ஆட்டத்தில் இந்தியா அபார வெற்றி பெற்றது.

தொடரைக் கைப்பற்றப் போவது யார் என்பதை நிர்ணயிக்கும் கடைசி ஆட்டம் புணேயில் நேற்று நடைபெற்றது. டாஸ் வென்ற இலங்கை பீல்டிங்கை தேர்வு செய்தது. முதலில் ஆடிய இந்தியா 201/6 ரன்களை குவித்தது. ராகுல், 1 சிக்ஸர், 5 பவுண்டரியுடன் 36 பந்துகளில் 54 ரன்களை விளாசினார். தவன் 1 சிக்ஸர், 7 பவுண்டரியுடன் 36 பந்துகளில் 52 ரன்கள் எடுத்தார். 4 பவுண்டரியுடன் 18 பந்துகளில் 31 ரன்களை எடுத்தார் மணிஷ் பாண்டே. ஷர்துல் தாக்குர் 2 சிக்ஸர், 1 பவுண்டரியுடன் 8 பந்துகளில் 22 ரன்களை விளாசி இந்திய அணி 200 ரன்களைத் தாண்ட முக்கியக் காரணமாக இருந்தார். இரண்டாவதாக ஆடிய இலங்கை அணி 123 ரன்களுக்கும் ஆல் அவுட்டாகியது. இந்திய தரப்பில் அபாரமாக பந்துவீசிய நவ்தீப் சைனி 3-28, சர்துல் 2-19, வாஷிங்டன் சுந்தர் 2-37 விக்கெட்டுகளை வீழ்த்தினர்.

இலங்கைக்கு எதிரான கடைசி டி20 ஆட்டத்தை 78 ரன்கள் வித்தியாசத்தில் வென்று தொடரையும் 2-0 என கைப்பற்றியது இந்தியா. தொடர் நாயகனாக நவ்தீப் சைனியும், ஆட்ட நாயகனாக ஷர்துல் தாக்குரும் தேர்வு செய்யப்பட்டனர்.