தவானுக்கு அடுத்த சிக்கல்!

ஷிகர் தவானுக்கு தோள்பட்டையில் ஏற்பட்டுள்ள காயம் காரணமாக அவர் நியூஸிலாந்துக்கு செல்வது தற்போது சிக்கலாகியுள்ளது.

இந்தியா, ஆஸ்திரேலியா அணிகளுக்கிடையிலான தொடரைத் தீர்மானிக்கும் 3வது ஒருநாள் கிரிக்கெட் ஆட்டம் பெங்களூருவில் நடைபெற்று வருகிறது. இந்த ஆட்டத்தில் பீல்டிங் செய்யும்போது இந்திய அணியின் ஷிகர் தவானுக்கு தோள்பட்டையில் காயம் ஏற்பட்டது. இதையடுத்து, அவர் மேற்கொண்டு பீல்டிங் செய்யவில்லை.

இதைத் தொடர்ந்து, பேட்டிங்கிலும் அவர் களமிறங்கவில்லை. கேஎல் ராகுலே மீண்டும் தொடக்க ஆட்டக்காரராக களமிறங்கினார். இந்திய அணி பேட்டிங்கைத் துவங்கிய பிறகு தவான் குறித்த அறிவிப்பு எதையும் பிசிசிஐ அறிவிக்கவில்லை.

ஆஸ்திரேலியாவுடனான தொடருக்குப் பிறகு இந்திய அணி நியூஸிலாந்துடன் 5 ஆட்டங்கள் கொண்ட டி20 தொடரில் விளையாடுகிறது. இதற்காக இந்திய வீரர்கள் பெங்களூருவில் இருந்து நாளை காலை (திங்கள்கிழமை) நியூஸிலாந்துக்குப் புறப்படுகின்றனர். இந்தத் தொடருக்கான இந்திய அணியில் ஷிகர் தவானும் இடம்பெற்றுள்ளார்.

எனவே, இந்தக் காயம் காரணமாக டி20 தொடரில் பங்கேற்பதற்காக நியூஸிலாந்து செல்வதில் தவானுக்கு தற்போது சிக்கல் ஏற்பட்டுள்ளது.