பேட்டிங்கில் தன்னுடைய சிறந்த இணை தோனி தான் என இந்திய விக்கெட் கீப்பர் ரிஷப் பந்த் கூறியுள்ளார்.
தில்லி கேபிடல்ஸ் ஐபிஎல் அணியுடனான இணைய உரையாடலில் ரிஷப் பந்த் கூறியதாவது:
பேட்டிங்கில் என்னுடைய சிறந்த இணை தோனி தான். ஆனால் அவருடன் இணைந்து விளையாடும் வாய்ப்பு அடிக்கடி கிடைப்பதில்லை. அவர் ஆடுகளத்தில் இருந்தால் எல்லாப் பிரச்னைகளும் தீர்ந்துவிடும். தன்னுடைய திட்டங்களை நம்மிடம் கூறுவார். அதை அப்படியே பின்பற்றினால் போதும். இலக்கை விரட்டும் போது அவர் மூளை அபாரமாக வேலை செய்யும்.
விராட் கோலி, ரோஹித் சர்மாவுடன் இணைந்து விளையாடுவதும் நன்றாக இருக்கும். இவர்களைப் போன்ற மூத்த வீரர்களுடன் விளையாடும்போது வித்தியாசமான அனுபவம் கிடைக்கும். அவர்களுடைய எண்ண ஓட்டம் எப்படி உள்ளது எனக் கவனிக்கலாம். இது ஒரு தனி உணர்வு என்றார்.
22 வயது பந்த் இதுவரை 13 டெஸ்டுகள், 16 ஒருநாள், 28 ஆட்டங்களில் விளையாடியுள்ளார்.