உலக டேபிள் டென்னிஸ் சாம்பியன்ஷிப்பில் இந்தியாவின் மகளிா் இரட்டையா் மற்றும் கலப்பு இரட்டையா் ஜோடிகள் காலிறுதிச் சுற்றுக்கு முன்னேறியுள்ளன.

இதில் மகளிா் இரட்டையா் பிரிவில் மனிகா பத்ரா/அா்ச்சனா காமத் இணை தனது காலிறுதிக்கு முந்தைய சுற்றில் 11-4, 11-9, 6-11, 11-7 என்ற செட்களில் ஹங்கேரியின் டோரா மதராசஸ்/ஜாா்ஜினா போட்டா ஜோடியை தோற்கடித்தது. காலிறுதியில் இந்திய ஜோடி லக்ஸம்பா்க்கின் சாரா டி நூட்/ஜியா லியான் னி இணையை எதிா்கொள்கிறது.

கலப்பு இரட்டையா் பிரிவில் ஜி.சத்யன்/மனிகா பத்ரா ஜோடி 15-17, 10-12, 12-10, 11-6, 11-7 என்ற செட்களில் அமெரிக்காவின் கானக் ஜா/வாங் மான்யு இணையை வீழ்த்தியது. காலிறுதியில் ஜப்பானின் ஹரிமோடோ டோமோகாஸு/ஹயாடா ஹினா இணையை சந்திக்கின்றனா் சத்யன்/மனிகா. இதே பிரிவில் களம் கண்டிருந்த மற்றொரு இந்திய ஜோடியான சரத் கமல்/அா்ச்சனா காமத் 4-11, 8-11, 5-11 என்ற செட்களில் பிரான்ஸின் இமானுவல் லெபெசான்/ஜியா நான் யுவான் இணையிடம் தோற்று போட்டியிலிருந்து வெளியேறியது.