ஸ்பெயின் லா லிகா கால்பந்து போட்டியில் பாா்சிலோனா 1-0 என்ற கோல் கணக்கில் ரியல் சோசிடட்டை வியாழக்கிழமை வீழ்த்தியது.

இந்த ஆட்டத்தில் பாா்சிலோனாவுக்காக பியரி எமரிக் அவ்பம்யாங் 11-ஆவது நிமிஷத்திலேயே ஃபெரான் டோரஸ் உதவியுடன் கோலடித்தாா். பாா்சிலோனாவின் இந்த வெற்றியால், லா லிகா கோப்பையை கைப்பற்றும் ரியல் மாட்ரிட்டின் நாள்கள் சற்றே தள்ளிப்போனது. ஏனெனில், புள்ளிகள் பட்டியலில் முதலிடத்தில் இருக்கும் ரியல் மாட்ரிட்டுக்கும், அடுத்த இடத்திலிருக்கும் பாா்சிலோனாவுக்கும் இடையே 15 புள்ளிகளே வித்தியாசம் உள்ளன. வரும் ஞாயிற்றுக்கிழமை ராயோ வல்கேனோ அணியை பாா்சிலோனா வெல்லும் பட்சத்தில், இந்த வித்தியாசம் 12 புள்ளிகளாகக் குறையும்.

இதர ஆட்டங்களில் அத்லெடிக் கிளப் - காடிஸையும் (3-2), செவில்லா - லெவான்டேவையும் (3-2), ராயோ வல்கேனோ - எஸ்பான்யோலையும் (1-0) வென்றன. இதில் செவில்லா பதிவு செய்துள்ள வெற்றி, சாம்பியன்ஸ் லீக் போட்டிக்கு அந்த அணி தகுதிபெறும் வாய்ப்பை அதிகரித்துள்ளது.