தமிழக இளம் செஸ் வீரர் குகேஷுக்கு உலக சாம்பியன் மேக்னஸ் கார்ல்சன் பாராட்டு தெரிவித்துள்ளார்.

செஸ் தரவரிசையில் 2700 புள்ளிகளைக் குறைந்த வயதில் அடைந்த இந்திய வீரர் என்கிற பெருமையை அடைந்துள்ளார் குகேஷ். உலகளவில் 3-வது இளம் வீரர். ஸ்விட்சர்லாந்தில் நடைபெற்ற போட்டியில் இந்தச் சாதனையை அவர் படைத்துள்ளார். சீனாவின் வீ யி, 15 வருடங்கள், 7 மாதங்கள், 28 நாள்களில் 2700 புள்ளிகளை அடைந்து உலக சாதனை படைத்தார். பிரான்ஸைச் சேர்ந்த அலிரேஸா, 16 வருடங்கள், 1 மாதம், 10 நாள்களிலும் குகேஷ் 16 வருடங்கள், 1 மாதம், 17 நாள்களிலும் இந்த உயரத்தை அடைந்துள்ளார்கள். 2019-ல் இந்தியாவின் இளம் செஸ் கிராண்ட்மாஸ்டர் (12 வயது) என்கிற சாதனையைப் படைத்தார் குகேஷ். உலகளவில் 2-வது இடம். 

2700 புள்ளிகளைப் பெற்று சாதனை படைத்த குகேஷுக்குப் பாராட்டு தெரிவித்துள்ள விஸ்வநாதன் ஆனந்த், குகேஷின் சாதனை சென்னைக்கு நன்மையை ஏற்படுத்தும் என்று கூறியுள்ளார். 

உலக செஸ் சாம்பியன் கார்ல்சன், குகேஷுக்குப் பாராட்டு தெரிவித்து, அற்புதமான சாதனை இது என ட்வீட் வெளியிட்டுள்ளார்.