டெஸ்ட் கிரிக்கெட்டில் அனில் கும்ப்ளேவின் சாதனையை ரவிச்சந்திரன் அஸ்வின் சமன் செய்துள்ளார்.

இந்தியா மற்றும் இங்கிலாந்து அணிகளுக்கு இடையேயான 4-வது டெஸ்ட் போட்டி ராஞ்சியில் நடைபெற்றது. இந்தப் போட்டியில் இந்திய அணி 5 விக்கெட்டுகள் வித்தியாசத்தில் வெற்றி பெற்றது. இந்த வெற்றியைத் தொடர்ந்து 5 போட்டிகள் கொண்ட டெஸ்ட் தொடரையும் 3-1 என்ற கணக்கில் இந்திய அணி கைப்பற்றியது.

இந்தப் போட்டியின் இரண்டாவது இன்னிங்ஸில் இந்திய அணியின் சுழற்பந்துவீச்சாளர் அஸ்வின் 5 விக்கெட்டுகளைக் கைப்பற்றி அசத்தினார். டெஸ்ட் கிரிக்கெட்டில் இது அவரது 35-வது 5 விக்கெட்டுகள் ஆகும். இதன்மூலம், புதிய சாதனை ஒன்றையும் அஸ்வின் படைத்துள்ளார். டெஸ்ட் கிரிக்கெட்டில் அதிகமுறை 5 விக்கெட்டுகள் (35 முறை) வீழ்த்திய இந்திய அணியின் முன்னாள் சுழற்பந்துவீச்சாளர் அனில் கும்ப்ளேவின் சாதனையை அஸ்வின் சமன் செய்துள்ளார்.

ஒட்டு மொத்தமாக டெஸ்ட் போட்டிகளில் அதிக முறை 5 விக்கெட்டுகள் வீழ்த்திய வீரர்களில் அஸ்வின் 4-வது இடத்தில் உள்ளது குறிப்பிடத்தக்கது.