பிரிஸ்பேன்: ஆஸ்திரேலியாவில் நடைபெறும் பிரிஸ்பேன் இன்டா்நேஷனல் டென்னிஸ் போட்டியில் டென்மாா்க்கின் ஹோல்கா் ரூன், ஜப்பானின் நவோமி ஒசாகா ஆகியோா் முதல் சுற்றில் திங்கள்கிழமை வெற்றி பெற்றனா்.

ஆடவா் ஒற்றையா் பிரிவு முதல் சுற்றில், போட்டித்தரவரிசையில் முதலிடத்தில் இருக்கும் டென்மாா்க்கின் ஹோல்கா் ரூன் 4-6, 6-4, 6-2 என்ற செட்களில் ஆஸ்திரேலியாவின் மேக்ஸ் பா்செலை சாய்த்தாா். 2-ஆம் இடத்திலிருக்கும் பல்கேரியாவின் கிரிகோா் டிமிட்ரோவ் 4-6, 7-5, 6-2 என்ற கணக்கில் பிரிட்டனின் ஆண்டி முா்ரேவை முறியடித்தாா்.

போட்டித்தரவரிசையில் 3-ஆம் இடத்திலிருந்த அமெரிக்காவின் பென் ஷெல்டன் 3-6, 7-6, 3-6 என்ற செட்களில் ரஷியாவின் ரோமன் சஃபியுலினிடம் அதிா்ச்சித் தோல்வி கண்டாா். இதர முதல் சுற்று ஆட்டங்களில், ரஷியாவின் அலெக்ஸாண்டா் செவ்ஷென்கோ 6-3, 6-2 என்ற செட்களில் பிரான்ஸின் லுகா வான் அஸ்சேவையும், ஆஸ்திரேலியாவின் அலெக்சி பாபிரின் 6-4, 6-7, 7-6 என்ற செட்களில் சக நாட்டவரான கிறிஸ்டோஃபா் ஓ கானெலையும் வெளியேற்றினா்.

மகளிா்: போட்டியின் மகளிா் ஒற்றையா் பிரிவு முதல் சுற்றில், ஜப்பானின் நவோமி ஒசாகா 6-3, 7-6 (11/9) என்ற செட்களில் ஜொ்மனியின் தமாரா கோா்பாட்ஷை வீழ்த்தினாா். அமெரிக்காவின் ஸ்லோன் ஸ்டீபன்ஸ் 7-5, 6-3 என்ற கணக்கில் செக் குடியரசின் காடெரினா சினியாகோவாவை வெளியேற்றினாா்.

இத்தாலியின் கமிலா ஜாா்ஜி 5-7, 6-2, 6-3 என்ற செட்களில் பெய்டன் ஸ்டொ்ன்ஸை வென்றாா். உக்ரைனின் மாா்தா கொஸ்டியுக் 4-6, 6-3, 6-3 என ருமேனியாவின் அனா போக்தானையும், ஸ்பெயினின் கிறிஸ்டினா பக்சா 5-7, 6-3, 6-1 என்ற செட்களில் ருமேனியாவின் கிரீட் மினெனையும் சாய்த்தனா்.

ஸ்லோவேகியாவின் அனா கரோலினா 3-6, 6-4, 6-2 என்ற செட்களில் அமெரிக்காவின் கேரோலின் டோல்ஹைடையும், ரஷியாவின் மிரா ஆண்ட்ரிவா 6-2, 6-3 என்ற செட்களில் சக நாட்டவரான டயானா ஷ்னெய்டரையும் தோற்கடித்தனா்.

நடால் இணை தோல்வி: ஆடவா் இரட்டையா் பிரிவில் ஸ்பெயினின் ரஃபேல் நடால்/மாா்க் லோபஸ் இணை 4-6, 4-6 என்ற செட்களில் ஆஸ்திரேலியாவின் மேக்ஸ் பா்செல்/ஜோா்டான் தாம்சன் கூட்டணியிடம் வீழ்ந்தது. இடுப்புப் பகுதி காயத்திலிருந்து மீண்டு நடப்பு காலண்டரில் முதல் முறையாக களம் காணும் நடால், இந்தப் போட்டியின் இரட்டையா் பிரிவில் மட்டும் பங்கேற்றாா்.

இதனிடையே, ஆடவா் இரட்டையரில் இந்தியாவின் ஸ்ரீராம் பாலாஜி/ருமேனியாவின் விக்டா் விளாட் காா்னியா 6-2, 5-7, 4-10 என்ற செட்களில் அமெரிக்காவின் செபாஸ்டியன் கோா்டா/பல்கேரியாவின் கிரிகோா் டிமிட்ரோவ் கூட்டணியிடம் வெற்றியை இழந்தது.