தமிழகத்திற்கு நவோதயா பள்ளிகள் தேவையற்றது என மாநிலங்களவை உறுப்பினர் கனிமொழி தெரிவித்தார். 
சென்னையிலிருந்து மதுரை வந்த அவர் விமான நிலையத்தில் செய்தியாளர்களிடம் கூறியது: நவோதயா பள்ளிகளை தமிழகத்திற்கு கொண்டு வரக்கூடாது என்பதில் திமுக உறுதியாக உள்ளது. திமுக செயல்தலைவர் மு.க. ஸ்டாலினும் அதை எதிர்த்து அறிக்கை விட்டுள்ளார். நவோதயா பள்ளிகள் தமிழகத்திற்கு தேவையற்றவை. மத்திய அரசு நாம் கேட்கும் திட்டங்களை நிராகரித்துவிட்டு எதிர்க்கும் திட்டங்களை தமிழகத்தில் திணிக்க முயல்கிறது. தமிழகத்தில் நடைபெறும் எந்த போராட்டத்தையும் மாநில அரசு கண்டுகொள்வதில்லை. நடிகர் கமல்ஹாசன் அரசியலுக்கு வருவதில் தவறில்லை. மக்களுக்கு நல்லது செய்ய யார் வேண்டுமானாலும் அரசியலுக்கு வரலாம் என்றார்.