ஆகஸ்ட் 1 முதல் 14 தொலைக்காட்சிகளின் மூலமாக வகுப்பு வாரியாக பாடம் நடத்த ஏற்பாடு செய்யப்பட்டு வருவதாக பள்ளிக்கல்வித்துறை அமைச்சர் செங்கோட்டையன்  தெரிவித்துள்ளார். 

தமிழகத்தில் கரோனா பரவும் சூழ்நிலையால் ஜூன் மாதம் திறக்க வேண்டிய பள்ளிகள் இன்னும் திறக்கப்படாமல் உள்ளது. மேலும் கடந்த கல்வியாண்டில் தேர்வுகள் நடத்த முடியாத சூழ்நிலையில் 10 ஆம் வகுப்பு பொதுத் தேர்வு ரத்து செய்யப்பட்டதாக அறிவிக்கப்பட்டது. 

பள்ளிகள் திறக்க முடியாத சூழ்நிலையில் தனியார் பள்ளிகள் பெரும்பாலானவை ஆன்லைன் வகுப்புகளைத் தொடங்கியுளளன. இந்நிலையில், அரசுப் பள்ளி மாணவர்களுக்கு கல்வி தொலைக்காட்சி வாயிலாக வகுப்புகள் நடத்தப்படும் என அமைச்சர் ஏற்கெனவே கூறியிருந்தார். 

இதையடுத்து ஈரோடு மாவட்டம் கோபிசெட்டிபாளையத்தில் செய்தியாளர்களிடம் பேசிய அமைச்சர் செங்கோட்டையன், 

14 தொலைக்காட்சிகளின் மூலமாக ஆகஸ்ட் 1 முதல் வகுப்பு வாரியாக பாடம் நடத்த ஏற்பாடு செய்யப்பட்டு வருகிறது. இந்தியாவில் முதல் முறையாக தொலைக்காட்சிகள் மூலம் பாடம் நடத்தும் முதல் மாநிலம் தமிழகம்தான் என்று தெரிவித்தார்.

மேலும், பள்ளிகள் திறப்பு, நடப்பு கல்வியாண்டில் பாடங்களை குறைப்பது பற்றி பரிசீலனை செய்யப்பட்டு வருகிறது என்று கூறிய அவர், தனிமைப்படுத்தப்பட்ட பகுதிகளில் இருக்கும் மாணவர்கள், மதிப்பெண் மறுமதிப்பீடு கோரினால் அதுகுறித்தும் அரசு பரிசீலிக்கும் என்றார்.