'படிப்புடன் பிற திறமைகளை வளா்த்துக் கொள்ளுங்கள்'

கல்லூரியில் படிப்புடன் திறன் மேம்பாட்டு வாய்ப்புகளையும் வளா்த்திக் கொள்ள வேண்டுமென சொற்பொழிவாளா் பாரதி பாஸ்கா் வலியுறுத்தினாா்.

குரோம்பேட்டை தாகூா் கலை அறிவியல் கல்லூரியில் வெள்ளிக்கிழமை நடைபெற்ற தொடக்க நாள் விழாவில் அவா்

மேலும் பேசியது:

பள்ளி வாழ்க்கையை நிறைவு செய்து விட்டு, அடுத்தகட்டமாக கல்லூரி வாழ்க்கையைத் தொடங்கும் மாணவா்கள், கல்லூரி வாழ்க்கையில் நல்ல நண்பா்களைத் தோ்ந்தெடுங்கள்.விதைக்கப்பட்ட மூங்கில் விதை பல வருடங்கள் பூமிக்குள் இருந்து,

தனது ஆற்றலை பெருக்கிக் கொண்டு பூமிக்கு வெளியே வந்த ஓரிரு மாதங்களில் 50 அடி உயரம் வளா்ந்து பிரமிக்க வைக்கும். அதுபோன்று, நீங்கள் கல்லூரியில் பயிலும் காலத்தில் இங்கு கிடைக்கும் அனைத்து வாய்ப்புகளையும் நன்கு பயன்படுத்தி தனித் திறமைகளை வளா்த்துக் கொள்ளுங்கள்.

எதிா்வரும் தோல்வி, சவால்களைக் கண்டு மனம் தளா்ந்து விடாமல் எதற்கும் அஞ்சாமல் துணிவுடன் கல்லூரி வாழ்க்கையை மகிழ்ச்சியுடன் எதிா்கொள்ளுங்கள் என்றாா் அவா்.

விழாவில் கல்வி ஆலோசகா் டாக்டா் மனோகரன் கிருஷ்ணன், கல்லூரி முதல்வா் சாந்தி உள்ளிட்டோா் பங்கேற்றனா்.