முதல்வர் மு.க.ஸ்டாலினிடம் வாழ்த்து பெற்ற அமைச்சர் உதயநிதி!

தமிழக அமைச்சராகப் பொறுப்பேற்றுக்கொண்ட பின்னர் சென்னை தலைமைச் செயலகத்தில் முதல்வர் மு.க.ஸ்டாலினை சந்தித்து உதயநிதி ஸ்டாலின் வாழ்த்துப் பெற்றார். 

சேப்பாக்கம்-திருவல்லிக்கேணி சட்டப்பேரவை உறுப்பினரும், திமுக இளைஞரணிச் செயலாளருமான உதயநிதி ஸ்டாலின் தமிழக அமைச்சராக இன்று(புதன்கிழமை) பதவியேற்றார். 

சென்னை ஆளுநர் மாளிகையில் நடைபெற்ற விழாவில் உதயநிதிக்கு தமிழக ஆளுநர் ஆர்.என்.ரவி, பதவிப் பிரமாணத்துடன், ரகசிய காப்பு பிரமாணத்தையும் செய்து வைத்தார்.

இந்த நிகழ்வில், முதல்வர் மு.க.ஸ்டாலின், சட்டப்பேரவை தலைவர் அப்பாவு, தமிழக அமைச்சர்கள், சென்னை உயர்நீதிமன்ற தலைமை நீதிபதி, தலைமைச் செயலாளர், கூட்டணிக் கட்சிகளின் தலைவர்கள், மூத்த அதிகாரிகள் உள்ளிட்ட பலரும் பங்கேற்றனர். 

இதையும் படிக்க | 'அன்புத் தம்பி உதயநிதிக்கு வாழ்த்துகள்' - ரஜினிகாந்த்

தமிழக அமைச்சரவையில் 35 ஆவது அமைச்சராகப் பதவியேற்ற உதயநிதிக்கு இளைஞா் நலன், விளையாட்டு மேம்பாட்டுத் துறை ஒதுக்கப்பட்டுள்ளது. 

அமைச்சராகப் பதவியேற்றுள்ள உதயநிதிக்கு அரசியல் பிரமுகர்கள், திரையுலக பிரபலங்கள் பலரும் வாழ்த்துத் தெரிவித்து வருகின்றனர். 

பதவியேற்ற பின்னர் சென்னை தலைமைச் செயலகத்தில் உள்ள தனது அறையில் பொறுப்பேற்றுக்கொண்ட உதயநிதி, பின்னர் முதல்வர் மு.க.ஸ்டாலினை நேரில் சந்தித்து வாழ்த்து பெற்றார். இந்நிகழ்வின்போது அமைச்சர்கள் பலரும் உடனிருந்தனர். 

முன்னதாக, அமைச்சராகப் பதவியேற்றதற்கு முன்னரும் உதயநிதி தனது தந்தையும் முதல்வருமான மு.க.ஸ்டாலினிடம் ஆசி பெற்றது குறிப்பிடத்தக்கது. 

இதையும் படிக்க | அமைச்சரானார் உதயநிதி ஸ்டாலின்!