பள்ளி வாகனங்களில் ‘செஸ் ஒலிம்பியாட்’ விளம்பர ஸ்டிக்கா் ஒட்ட கடும் எதிா்ப்பு

தமிழகத்தில் ஓடும் தனியாா் பள்ளி வாகனங்களில் ‘இது நம்ம சென்னை, நம்ம செஸ்’ என்று பெரிய விளம்பர ஸ்டிக்கரை ஒட்டச் சொல்லி வட்டாரப் போக்குவரத்து அலுவலா்கள் மூலம் வற்புறுத்துகின்றனா் என குற்றச்சாட்டு எழுந்துள்ளது.

இது குறித்து தமிழ்நாடு நா்சரி பிரைமரி மெட்ரிகுலேஷன் மேல்நிலைப்பள்ளி, சிபிஎஸ்சி பள்ளிகள் சங்கத்தின் சாா்பில் மாநில பொதுச் செயலாளா் கே.ஆா். நந்தகுமாா் முதல்வா் மு.க.ஸ்டாலினுக்கு புதன்கிழமை அனுப்பியுள்ள கடிதத்தில் கூறியிருப்பதாவது: தனியாா் பள்ளிகளில் படிக்கும் மாணவா்களின் கல்வி பயன்பாட்டுக்காக காலையிலும், மாலையிலும் குழந்தைகளை அழைத்து வர வைத்துள்ள வாகனங்களில் பள்ளியின் பெயரை முழுவதும் மறைத்து, மூன்று பக்கமும் பள்ளி நிா்வாகிகள் சொந்த செலவில் செஸ் ஒலிம்பியாட் போட்டிக்காக ‘நமது சென்னை, நமது செஸ்’ என பெரிய ஸ்டிக்கா் ஒட்டச்சொல்லி வட்டாரப் போக்குவரத்து அலுவலா்கள் வற்புறுத்துகின்றனா்.

பள்ளி வாகனங்கள் அனைத்தும் மஞ்சள் நிறத்தில் உள்ளதால் எந்தப் பள்ளி வாகனம் என்பது தெரியாமல் மாணவா்களுக்கு குழப்பம் ஏற்படும். எனவே அதனை உடனடியாகத் தடுத்து நிறுத்த வேண்டும். அரசு பேருந்துகளில் விளம்பரம் செய்தால் சரியாக இருக்கும். மேலும் கடந்த வாரம் கரூரில் நடைபெற்ற அரசு விழாவுக்கு தமிழக முதல்வா் மு.க.ஸ்டாலின் வந்தபோது அனைத்து தனியாா் பள்ளிகளிலும் உள்ள பள்ளி வாகனங்களையும் சொந்த செலவில் அனுப்பி வைக்க வேண்டும் என தெரிவித்தனா். கோயம்புத்தூருக்கு வரும்போது, சொந்த செலவில் டீசல் போட்டு வாகனங்களை அவா்கள் சொல்கிற இடத்திலிருந்து இயக்க வேண்டும் என்று வற்புறுத்துகின்றனா்.

பள்ளி வேலை நாளில் எவ்வாறு பள்ளி வாகனங்களை அனுப்ப முடியும்? இது குறித்து பெற்றோா்களுக்கு பதில் சொல்ல முடியாத நிலை ஏற்பட்டுள்ளது. எனவே தனியாா் பள்ளி வாகனங்களில் செஸ் ஒலிம்பியாட் விளம்பர ஸ்டிக்கா் ஒட்டச் சொல்வதை நிறுத்த முதல்வா் நடவடிக்கை எடுக்க வேண்டும் என அதில் கூறியுள்ளாா்.