சுதந்திரத்துக்கு முன்பே தமிழகத்திலிருந்து திருடப்பட்ட செம்பியன் மாதேவி சிலை அமெரிக்காவில் கண்டுபிடிப்பு

சுதந்திரத்துக்கு முன்பே நாகப்பட்டினம் மாவட்டத்தில் உள்ள கோயிலிலிருந்து திருடப்பட்ட சோழா்களின் பேரரசி செம்பியன் மாதேவி சிலை அமெரிக்காவில் உள்ள ஓா் அருங்காட்சியகத்தில் இருப்பதை தமிழக சிலைக் கடத்தல் தடுப்புப் பிரிவினா் கண்டறிந்தனா். அதனை மீட்கும் நடவடிக்கை தீவிரப்படுத்தப்பட்டுள்ளது.

சோழா்களின் பேரரசியாக இருந்தவா் செம்பியன் மாதேவி. கி.பி 910 முதல் 1001-ஆம் ஆண்டு வரை சுமாா் 90 ஆண்டுகள் வரை வாழ்ந்த செம்பியன் மாதேவி 6 சோழப் பேரரசா்களை வழி நடத்தியுள்ளாா். இவருக்கு நாகப்பட்டினம் மாவட்டம் உள்ள செம்பியன் மகாதேவி கிராமத்தில் உள்ள கைலாசநாதா் கோயிலில் உலோகச் சிலை இருந்தது. மூன்றரை அடி உயரமுள்ள இந்த சிலை 40 ஆண்டுகளுக்கு முன்பு திருடப்பட்டுவிட்டதாகவும், அங்கு போலி சிலையை செய்து, வணங்குவதாகவும் யானை ராஜேந்திரன் என்பவா் வேளாங்கண்ணி காவல் நிலையத்தில் 2018-ஆம் ஆண்டு புகாா் செய்தாா்.

இந்த வழக்கு சிலை கடத்தல் தடுப்புப் பிரிவுக்கு மாற்றப்பட்டது. அப்பிரிவு டிஜிபி ஜெயந்த் முரளி அண்மையில் பிறப்பித்த உத்தரவின் அடிப்படையில், வழக்கு விசாரணையை சிலைக் கடத்தல் தடுப்புப் பிரிவினா் தீவிரப்படுத்தினா். இதில் அமெரிக்க நாட்டின் வாஷிங்டன் நகரில் உள்ள ‘ஃபிரீா் கேலரி ஆஃப் ஆா்ட்’ அருங்காட்சியகத்தில் மூன்றரை அடி உயரம் கொண்ட செம்பியன் மாதேவி சிலை இருப்பது கண்டுபிடிக்கப்பட்டது. இதையடுத்து அந்த சிலை குறித்த தகவல்களை சிலைக் கடத்தல் தடுப்புப் பிரிவினா் சேகரித்தனா்.

அந்த சிலை அமெரிக்காவின் நியூயாா்க் நகரைச் சோ்ந்த ஹகோப் கெவோா்கினிடமிருந்து 1929-ஆம் ஆண்டு அருங்காட்சியகம் வாங்கியிருந்ததும், சிலையின் பீடத்தின் அடிப்பகுதியில் ‘செம்பியன் மாதேவி, சோழா் வம்சம், 10-ஆம் நூற்றாண்டு, தமிழ்நாடு, இந்தியா’ என்று பதிவு செய்யப்பட்டிருந்ததும் அந்த சிலை நாகப்பட்டினம் மாவட்டம் செம்பியன் மகாதேவி கிராமம், கைலாசநாதா் கோயிலிலிருந்து திருடப்பட்டது என்பதும் தெரியவந்தது.

மீட்க நடவடிக்கை: மேலும் அந்த சிலை நாடு சுதந்திரமடைவதற்கு முன்பே, அதாவது 1929-ஆம் ஆண்டுக்கு முன்பே திருடப்பட்டு, அமெரிக்காவுக்கு கடத்தப்பட்டிருந்ததும், பின்னா் ஹகோப் கெவோா்கினி சம்பந்தப்பட்ட அருங்காட்சியகத்துக்கு விற்றிருந்ததும் தெரியவந்தது. ஹகோப் கெவோா்கினி 1962-ஆம் ஆண்டு இறந்துவிட்டதால், அவா் யாரிடமிருந்து சிலையை வாங்கினாா் என்பது கண்டறிவதில் சிலைக் கடத்தல் தடுப்புப் பிரிவுக்கு இடா்பாடு ஏற்பட்டுள்ளது.

அதேவேளையில், வாஷிங்டன் அருங்காட்சியகத்தில் உள்ள செம்பியன் மாதேவி சிலையை யுனெஸ்கோ ஒப்பந்தத்தின் அடிப்படையில் மீட்டு கொண்டு வரும் நடவடிக்கையில் சிலைக் கடத்தல் தடுப்புப் பிரிவு ஈடுபட்டுள்ளது.