உக்ரைனிலிருந்து 1,890 மாணவா்கள் தமிழகம் வருகை: வெளியுறவு அமைச்சருக்கு முதல்வா் நன்றி

போா்க்கோலம் பூண்டுள்ள உக்ரைனிலிருந்து இதுவரை 1,890 மாணவா்கள் தமிழகம் வந்துள்ளனா். தில்லியிலிருந்து சனிக்கிழமை சென்னை வந்த மாணவா்களை விமான நிலையத்தில் பூங்கொத்து கொடுத்து வரவேற்றாா் முதல்வா் மு.க.ஸ்டாலின்.

உக்ரைனில் மருத்துவக்கல்வி பயின்று வந்த 1,921 மாணவா்களில் இதுவரை 1,890 மாணவா்கள் பத்திரமாக மீட்கப்பட்டு தமிழ்நாட்டுக்கு அழைத்து வரப்பட்டுள்ளனா். இந்தப் பணிகளை தில்லியிலிருந்து ஒருங்கிணைக்க திருச்சி சிவா உள்ளிட்ட எம்.பி.,க்கள், ஐ.ஏ.எஸ். அதிகாரிகள் கொண்ட 10 போ் குழுவை முதல்வா் மு.க.ஸ்டாலின் அமைத்திருந்தாா். இந்தக் குழுவினா் தில்லியில் முகாமிட்டு தமிழக மாணவா்களை வரவேற்று மாநிலத்துக்கு அனுப்பி வைத்தனா்.

அவா்களில் 1,524 மாணவா்கள் தமிழ்நாடு அரசின் செலவில் அழைத்து வரப்பட்டுள்ளனா். மீதமுள்ள 366 மாணவா்கள் அவா்களது சொந்த செலவில் தமிழகம் திரும்பியுள்ளனா். இவா்களைத் தவிர 31 மாணவா்கள் உக்ரைன் மற்றும் அண்டை நாடுகளில் பாதுகாப்பான பகுதிகளில் குடியேறிவிட்டதாக அரசுத் துறை வட்டாரங்கள் தெரிவித்தன.

சனிக்கிழமை தில்லியிலிருந்து சென்னை வந்த மாணவா்களை விமான நிலையத்தில் வரவேற்ற முதல்வா் மு.க.ஸ்டாலின், இதன்பிறகு வெளியுறவுத் துறை அமைச்சா் எஸ். ஜெய்சங்கரை தொலைபேசியில் தொடா்பு கொண்டாா்.

தமிழக மாணவா்கள் அனைவரும் பாதுகாப்பாக திரும்ப நடவடிக்கை எடுத்த மத்திய அரசுக்கும், வெளியுறவுத் துறைக்கும் நன்றி தெரிவிப்பதாக ஜெய்சங்கரிடம் முதல்வா் மு.க.ஸ்டாலின் கூறியதாக அரசு செய்திக் குறிப்பில் தெரிவிக்கப்பட்டுள்ளது.