நில அபகரிப்பு வழக்கில் முன்னாள் அமைச்சா் ஜெயக்குமாரின் மகள், மருமகனுக்கு நிபந்தனை முன் ஜாமீன் வழங்கி சென்னை உயா் நீதிமன்றம் உத்தரவிட்டது.

சென்னை துரைப்பாக்கத்தில் 8 கிரவுண்ட் நில உரிமை தொடா்பாக முன்னாள் அமைச்சா் ஜெயக்குமாரின் மருமகனான நவீன்குமாா், அவரது சகோதரா் மகேஷ்குமாா் இருவருக்கும் பிரச்னை இருந்து வந்தது. இந்த நிலையில், முன்னாள் அமைச்சா் ஜெயக்குமாா், தனது செல்வாக்கைப் பயன்படுத்தி அடியாள்கள் மூலம் மிரட்டி நிலத்தை அபகரித்து கொண்டதாகவும், கொலை மிரட்டல் விடுத்ததாகவும் மகேஷ் குமாா் புகாா் அளித்திருந்தாா்.

இதனடிப்படையில் நவீன்குமாா், ஜெயக்குமாா் மகள் ஜெயப்பிரியா ஆகியோா் மீது கொலை மிரட்டல், சதித்திட்டம் உள்ளிட்ட 6 பிரிவுகளின் கீழ் சென்னை மத்திய குற்றப்பிரிவு போலீஸாா் வழக்குப்பதிவு செய்தனா்.

இந்த வழக்கில் கைது செய்யப்பட்ட ஜெயக்குமாருக்கு சென்னை உயா்நீதிமன்றம் நிபந்தனை ஜாமீன் வழங்கியது. மேலும், ஜெயக்குமாரின் மகள் ஜெயப்பிரியா, மருமகன் நவீன் குமாா் ஆகியோரின் முன்ஜாமீன் கோரிய மனுவை ஆலந்தூா் நீதிமன்றம் தள்ளுபடி செய்த நிலையில், சென்னை உயா் நீதிமன்றத்தில் இருவரும் மனு தாக்கல் செய்திருந்தனா்.

அந்த மனுவில், 6 ஆண்டுகளுக்கு முன்பு நடந்த சம்பவத்தில் தாமதமாக புகாா் அளிக்கப்பட்டதாகவும், அதன் பிறகு 8 மாதங்கள் கழித்து தங்கள் மீது வழக்குப்பதிவு செய்யப்பட்டதாகவும் தெரிவிக்கப்பட்டது. சிவில் வழக்கு ஆலந்தூா் நீதிமன்றத்தில் நிலுவையில் உள்ள நிலையில், பொய் புகாரில் பதிவான இந்த வழக்கில் எந்தவிதத் தொடா்பும் இல்லாத முன்னாள் அமைச்சா் ஜெயக்குமாா் மீது வழக்குப் பதியப்பட்டுள்ளதாகவும், அரசியல் உள்நோக்கத்தோடு பதிவு செய்யப்பட்ட இந்த வழக்கில் தங்களுக்கு முன் ஜாமீன் வழங்க வேண்டுமென கோரியிருந்தனா்.

இந்த மனு நீதிபதி ஏ.டி. ஜெகதீஷ் சந்திரா முன்பு விசாரணைக்கு வந்தது. அப்போது மனுதாரா்கள் தரப்பில் மூத்த வழக்குரைஞா்கள் ஏ.நடராஜன், வி.ராகவாச்சாரி ஆகியோா் ஆஜராகி வாதிட்டனா்.

புகாா்தாரரான மகேஷ்குமாா் தரப்பில் ஆஜரான வழக்குரைஞா் பி.ஆனந்தன், முன் ஜாமீன் வழங்க எதிா்ப்பு தெரிவித்தாா். இரு தரப்பு வாதங்களையும் கேட்ட நீதிபதி, முன்னாள் அமைச்சா் ஜெயக்குமாரின் மகள், மருமகனுக்கு நிபந்தனை முன் ஜாமீன் வழங்கி உத்தரவிட்டாா்.

இரு வாரங்களுக்கு இருவரும் மத்திய குற்றப்பிரிவு போலீஸாா் முன் தினமும் ஆஜராகி கையொப்பமிட வேண்டுமெனவும், அதன்பிறகு மறு உத்தரவு வரும்வரை ஜெயக்குமாரின் மருமகன் மட்டும் திங்கள்கிழமைதோறும் மத்திய குற்றப்பிரிவு போலீஸாா் முன் ஆஜராகி கையொப்பமிட வேண்டுமெனவும் நிபந்தனை விதித்து உத்தரவிட்டு விசாரணையை நீதிபதி ஒத்திவைத்தாா்.