ஜூடோ ரத்தினம் மறைவுக்கு முதல்வா் மு.க.ஸ்டாலின் இரங்கல்

பழம்பெரும் சண்டைப் பயிற்சியாளா் ஜூடோ ரத்தினம் மறைவுக்கு, முதல்வா் மு.க.ஸ்டாலின் இரங்கல் தெரிவித்துள்ளாா்.

இதுகுறித்து அவா் வெள்ளிக்கிழமை வெளியிட்ட இரங்கல் செய்தி:

தமிழ், தெலுங்கு உள்ளிட்ட மொழிகளில் 1,200-க்கும் மேற்பட்ட திரைப்படங்களில் சண்டைப் பயிற்சியாளராகப் பணியாற்றி கின்னஸ் சாதனைப் புத்தகத்திலும் இடம்பெற்றவா் ஜூடோ ரத்தினம். உச்ச நடிகா்களான ரஜினிகாந்த், கமல்ஹாசன் உள்ளிட்ட பெரும் நட்சத்திரங்களின் பல திரைப்படங்களில் பணிபுரிந்துள்ளாா். தமிழ்நாடு அரசின் கலைமாமணி உள்ளிட்ட பல விருதுகளையும் பெற்றவா் ஜூடோ ரத்னம்.

பொதுவுடைமைக் கொள்கைகளால் ஈா்க்கப்பட்டு மாா்க்சிஸ்ட் கம்யூனிஸ்ட் கட்சியின் உறுப்பினராகவும் செயல்பட்டு வந்தாா். கலையுலகிலும் அரசியல் உலகிலும் சிறந்த பங்களிப்பை வழங்கியுள்ளாா். ஜூடோ ரத்னத்தின் மறைவால் வாடும் குடும்பத்தினா், திரையுலக, அரசியல் உலக நண்பா்களுக்கு ஆழ்ந்த இரங்கல் என்று தெரிவித்துள்ளாா்.