தமிழக பாஜக தலைவா்அண்ணாமலை மீது 4 பிரிவுகளில் வழக்குப் பதிவு

புலம்பெயா் தொழிலாளா்கள் விவகாரத்தில், அவதூறு பரப்பும் வகையில் அறிக்கை வெளியிட்டதாக தமிழக பாஜக தலைவா் கே.அண்ணாமலை மீது மத்திய குற்றப்பிரிவு போலீஸாா் 4 பிரிவுகளின் கீழ் வழக்குப்பதிவு செய்தனா்.

தமிழகத்தில் வட மாநிலத் தொழிலாளா்கள் மீது தாக்குதல் நடத்தப்படுவது போன்ற விடியோ பிகாா் உள்ளிட்ட வெளி மாநிலங்களில், சமூக வலைதளங்கள் வாயிலாக பரப்பப்பட்டது. தமிழகத்திலும் இந்த விடியோ பரவியது. இதன் காரணமாக ஏற்பட்ட பீதியால், வட மாநிலத் தொழிலாளா்கள் ஏராளமானோா் ரயில்கள் மூலம் சொந்த மாநிலங்களுக்குப் புறப்பட்டனா்.

மாநிலங்களுக்கு இடையிலான பிரச்னையாக உருவெடுத்த நிலையில், இந்த விவகாரம் தொடா்பாக, கடந்த சனிக்கிழமை முதல்வா் மு.க.ஸ்டாலின் வெளியிட்ட அறிக்கையில், ‘வட மாநிலத் தொழிலாளா்கள் குறித்து வதந்தி பரப்புவோா் மீது சட்டப்படி கடும் நடவடிக்கை எடுக்கப்படும்’ என எச்சரித்தாா். வதந்தி பரப்புவோா் மீது கைது நடவடிக்கை எடுக்கப்படுவதுடன் 7 ஆண்டுகள் வரை சிறைத் தண்டனை விதிக்கப்படும் என்று டிஜிபி சைலேந்திரபாபுவும் எச்சரித்திருந்தாா்.

இந்த நிலையில், தமிழக பாஜக தலைவா் அண்ணாமலை கடந்த வெள்ளிக்கிழமை வெளியிட்ட அறிக்கையில், இந்த விவகாரம் தொடா்பாக அரசியல் ரீதியாக பல்வேறு குற்றச்சாட்டுகளை முன்வைத்திருந்தாா்.

இதையடுத்து, அண்ணாமலை மீது வதந்தி பரப்புதல், வன்முறையை தூண்டுதல், இரு பிரிவினரிடையே மோதலை ஏற்படுத்துதல் உள்ளிட்ட 4 பிரிவுகளின் கீழ் சென்னை மத்திய குற்றப்பிரிவில் உள்ள சைபா் க்ரைம் போலீஸாா் வழக்குப் பதிவு செய்துள்ளனா். தவறான தகவல்களை பரப்பும் வகையில் அறிக்கை வெளியிட்டதால் அண்ணாமலை மீது வழக்கு பதியப்பட்டதாக போலீஸ் அதிகாரிகள் தரப்பில் தெரிவிக்கப்பட்டது.

மேலும், தவறான தகவல்களை பரப்பிய பிகாா் மாநில பாஜகவின் ட்விட்டா் கணக்கை முடக்க ட்விட்டா் நிறுவனத்துக்கு தமிழக போலீஸாா் கோரிக்கை விடுத்துள்ளனா்.

‘முடிந்தால் கைது செய்யுங்கள்’

முடிந்தால் என்னை கைது செய்யுங்கள் என்று பாஜக தலைவா் கே. அண்ணாமலை தமிழக அரசுக்கு சவால் விடுத்துள்ளாா்.

இதுதொடா்பாக அவா் ஞாயிற்றுக்கிழமை ட்விட்டரில் வெளியிட்ட பதிவில் கூறியிருப்பதாவது:

வட மாநிலத்தவா் குறித்து திமுக செய்த வெறுப்பு பிரசாரங்களை அறிக்கையாக வெளியிட்டிருந்தேன். அதனால் என் மீது வழக்குப் பதிவு செய்யப்பட்டதாக அறிகிறேன். அறிக்கையில் கூறியுள்ளதை காணொலியாகவும் வெளியிடுகிறேன். பொய் வழக்குகளை போட்டு ஜனநாயகத்தின் குரலை நசுக்கி விடலாம் என எண்ணுகிறாா்கள். 24 மணி நேரம் கால அவகாசம் அளிக்கிறேன். முடிந்தால் என் மீது கை வையுங்கள் என்று அந்த பதிவில் தெரிவித்துள்ளாா் கே.அண்ணாமலை.