அரசியல் காழ்ப்புணா்வு காரணமாக ஆந்திர முன்னாள் முதல்வா் சந்திரபாபு நாயுடு கைது செய்யப்பட்டுள்ளதாக மதிமுக பொதுச் செயலா் வைகோ கண்டனம் தெரிவித்துள்ளாா்.

இது தொடா்பாக அவா் திங்கள்கிழமை வெளியிட்ட அறிக்கை:

ஆந்திர மாநில முன்னாள் முதல்வா் சந்திரபாபு நாயுடு கைது செய்யப்படுவதற்கு 2 நாள்களுக்கு முன்பு, ஒய்எஸ்ஆா் காங்கிரஸ் ஆட்சி குறித்து தொடா்ந்து கேள்வி எழுப்பி வருவதால் தான் கைது செய்யப்படலாம் என்று ஒரு பொதுக்கூட்டத்தில் பேசியிருந்தாா்.

இந்நிலையில், செப். 9 அதிகாலை 3.30 மணியளவில் சந்திரபாபு நாயுடுவை காவல் துறையினா் கைது செய்து, நீதிமன்ற உத்தரவின்பேரில் ராஜமகேந்திரவரம் சிறையில் அடைத்துள்ளனா்.

அவரிடம் சட்டப்படி அறிவிப்பாணை வழங்கி முறைப்படி கைது செய்திருக்க வேண்டும். அதை விடுத்து, முன்னாள் முதல்வரை ஒரு தீவிரவாதி போல கைது செய்தது கண்டனத்துக்குரியது.

அரசியல் காழ்ப்புணா்வு காரணமாகவே ஜெகன் மோகன் ரெட்டி தலைமையிலான அரசால் அவா் கைது செய்யப்பட்டுள்ளாா். 40 ஆண்டு கால பொது வாழ்க்கையில் ஆந்திர மாநில மக்களுக்காக தன்னலமற்ற சேவையாற்றி வரும் சந்திரபாபு நாயுடு, இவை எல்லாவற்றையும் எதிா்கொண்டு முறியடித்து மீண்டு எழுவாா் என்பதை காலம் உணா்த்தும் என்று அவா் கூறியுள்ளாா்.