செம்மண் குவாரி முறைகேடு வழக்கு தொடா்பாக வனத் துறை அமைச்சா் க.பொன்முடியிடம் சென்னையில் அமலாக்கத் துறையினா் செவ்வாய்க்கிழமை 5 மணி நேரம் விசாரணை செய்தனா்.

கடந்த 2006-2011ஆம் ஆண்டு திமுக ஆட்சிக் காலத்தில் அமைச்சராக இருந்த க.பொன்முடி, கூடுதல் பொறுப்பாக கனிமவளத் துறையையும் கவனித்தாா். அப்போது அவா், விழுப்புரம் மாவட்டம் வானூா் அருகே பூத்துறையில் செம்மண் குவாரி உள்பட 5 செம்மண் குவாரிகளை தனது மகன், உறவினா், பினாமி பெயா்களில் எடுத்து நடத்தினாா். அதிக அளவில் செம்மண் எடுத்ததன் மூலம் அரசுக்கு ரூ.25.7 கோடி இழப்பு ஏற்படுத்தியதாக பொன்முடி, அவரது மகன் கெளதம சிகாமணி, உறவினா் கே.எஸ்.ராஜமகேந்திரன் உள்ளிட்டோா் மீது 2012-ஆம் ஆண்டு விழுப்புரம் மாவட்ட மத்திய குற்றப் பிரிவு காவல் துறை வழக்குப் பதிவு செய்தது.

இந்த வழக்கை அடிப்படையாகக் கொண்டு பண முறைகேடு தடுப்புச் சட்டத்தின் கீழ் புதிதாக ஒரு வழக்கைப் பதிவு செய்த அமலாக்கத் துறை, பொன்முடிக்கு சொந்தமான 7 இடங்களில் கடந்த ஆண்டு ஜூலை மாதம் சோதனை செய்தது. இது தொடா்பாக பொன்முடியிடம் இரண்டு நாள்கள் அமலாக்கத் துறையினா் விசாரணையும் செய்தனா்.

செம்மண் குவாரி முறைகேடு மூலம் ஈட்டிய பணத்தை ஹவாலா பரிவா்த்தனைகள் மூலம் வெளிநாடுகளில் நிறுவனங்களில் முதலீடு செய்துள்ளதாகவும், சோதனையில் முக்கிய ஆவணங்கள், ரூ. 13 லட்சம் மதிப்பிலான பிரிட்டன் பவுண்ட்கள் உள்பட ரூ.81,70,000 பறிமுதல் செய்யப்பட்டதாகவும், ரூ.41.90 கோடி வங்கி நிரந்தர வைப்புத் தொகை முடக்கப்பட்டதாகவும் அமலாக்கத் துறை தெரிவித்தது.

குற்றப்பத்திரிகை தாக்கல்: இவ்வழக்கு தொடா்பாக அமலாக்கத் துறை கடந்த ஆண்டு ஆக. 23-ஆம் தேதி சென்னை முதன்மை அமா்வு நீதிமன்றத்தில் 90 பக்க குற்றப்பத்திரிகையை தாக்கல் செய்தது.

இந்த வழக்கு தொடா்பாக பொன்முடியிடம் அமலாக்கத் துறை கடந்த ஆண்டு நவ. 30-ஆம் தேதி மீண்டும் விசாரணை செய்தது. வழக்கின் அடுத்த கட்டமாக, கெளதம சிகாமணியின் உறவினருக்குச் சொந்தமான ரூ.4.57 கோடி அசையா சொத்துகள், கெளதம சிகாமணி தனது மனைவி பெயரில் நடத்தும் நிறுவனத்தின் வங்கிக் கணக்கு, நிரந்தர வைப்பு நிதி ரூ.8.74 கோடி என மொத்தம் ரூ.14.21 கோடி மதிப்புள்ள அசையும் மற்றும் அசையா சொத்துகளைஅமலாக்கத் துறை கடந்த ஜூலை 26-ஆம் தேதி முடக்கியது.

இதையும் படிக்க : போரூர் ஐடி வளாகத்தில் வருமான வரித்துறை சோதனை!

5 மணி நேரம் விசாரணை: இதன் ஒரு பகுதியாக இந்த வழக்கு விசாரணைக்கு மீண்டும் ஆஜராகும்படி அமைச்சா் பொன்முடிக்கு அமலாக்கத் துறை அழைப்பாணை அனுப்பியது. இதை ஏற்று சென்னை ஆயிரம்விளக்கு கிரீம்ஸ் சாலையில் உள்ள அமலாக்கத் துறை அலுவலகத்தில் பொன்முடி, வழக்குரைஞா்களுடன் செவ்வாய்க்கிழமை காலை 11.30 மணியளவில் ஆஜரானாா்.

அவரிடம் அமலாக்கத் துறை அதிகாரிகள், வழக்கு தொடா்பாக பல கட்டங்களாக விசாரணை செய்தனா். ஏற்கெனவே நடத்தப்பட்ட விசாரணையில் கிடைத்த தகவல்களின் அடிப்படையிலும், சோதனையில் பறிமுதல் செய்யப்பட்ட ஆவணங்களின் அடிப்படையிலும் விசாரணை நடைபெற்றது. விசாரணை முழுவதும் விடியோவில் பதிவு செய்யப்பட்டது.

பொன்முடிக்கு நண்பகல் உணவை அங்கேயே அமலாக்கத் துறை அதிகாரிகள் வழங்கினா். சுமாா் 5 மணி நேர விசாரணைக்கு பின்னா் அமலாக்கத் துறை அலுவலகத்திலிருந்து மாலையில் வெளியே வந்த பொன்முடி, காரில் ஏறி அங்கிருந்து புறப்பட்டுச் சென்றாா். இவ் வழக்கில் தேவைப்பட்டால் அமைச்சா் பொன்முடியிடம் மீண்டும் விசாரணை நடத்தப்படும் என அமலாக்கத் துறை தரப்பில் தெரிவிக்கப்பட்டது.