2026 சட்டமன்றத் தேர்தலிலும் பாஜகவுடன் கூட்டணி: டிடிவி தினகரன்

தேனி மற்றும் திருச்சியில் போட்டியிடும் அமமுக வேட்பாளர்களை அக்கட்சியின் பொதுச் செயலாளர் டிடிவி தினகரன் இன்று அறிவித்தார்.

அதன்படி, தேனியில் டிடிவி தினகரனும், திருச்சியில் செந்தில் நாதனும் போட்டியிடுகின்றனர்.

தொடர்ந்து, செய்தியாளர்களுடன் பேசிய அமமுக பொதுச் செயலாளர் டிடிவி தினகரன், "தேனி மக்களவைத் தொகுதியில் போட்டியிடும் தங்க தமிழ்ச்செல்வன் எனது முன்னாள் நண்பர். தேனியில் யார் வெற்றி பெறுவார்கள் என்று மக்கள் முடிவு செய்வார்கள்.

நான் யாரையும் போட்டியாளராக கருதவில்லை. நான் யாருக்கும் குருவும் இல்லை, எனக்கு யாரும் சிஷ்யனும் இல்லை. மக்கள் செல்வர் என்ற பட்டத்தை தேனி மக்கள்தான் வழங்கினார்கள்.

மீண்டும் பிரதமராக மோடிதான் வரவுள்ளார். 2026 சட்டமன்றத் தேர்தலிலும் பாஜகவுடனான கூட்டணி தொடரும்" என்று தெரிவித்தார்.