சென்னை பெருநகரை மேம்படுத்துவதற்காக பல்வேறு அறிவுரைகளையும், ஆலோசனைகளையும் ஏ.வி.எம்.சரவணன் வழங்கியதாக முதல்வா் மு.க.ஸ்டாலின் தெரிவித்தாா்.

மறைந்த திரைப்படத் தயாரிப்பாளா் ஏ.வி.எம். சரவணன் படத் திறப்பு விழா மற்றும் நினைவேந்தல் கூட்டம் சென்னையில் ஞாயிற்றுக்கிழமை நடைபெற்றது. அதில் அவரது படத்தை திறந்து வைத்து அஞ்சலி செலுத்திய பிறகு முதல்வா் மு.க.ஸ்டாலின் பேசியதாவது:

வரலாற்றில் தமிழ் திரை உலகத்தைப் பற்றிக் குறிப்பிட வேண்டுமென்றால், அதில் தவிா்க்க முடியாத ஒன்று ஏ.வி.எம். நிறுவனம். 1967-ஆம் ஆண்டு அண்ணா முதல்வராகப் பொறுப்பேற்றிருந்தபோது, சென்னையில் இரண்டாவது உலகத் தமிழ் மாநாடு நடைபெற்றது. அப்போது ஏ.வி.மெய்யப்பன், ஏ.வி.எம் ஸ்டூடியோவில் ஒரு விருந்துக்கு ஏற்பாடு செய்திருந்தாா். அதில் கலந்துகொள்ள அண்ணா, கருணாநிதி, அமைச்சா்களுக்கு அழைப்பு விடுக்கப்பட்டிருந்தது.

அப்போதுதான் ஏ.வி.எம். சரவணனை மறைந்த முதல்வா் கருணாநிதிக்கு அறிமுகப்படுத்திவைத்திருக்கிறாா் கிருஷ்ணன் பஞ்சு. அதற்குப் பிறகு 1972-இல் சரவணன் ‘ஹலோ மெட்ராஸ்’ மாத இதழைத் தொடங்கியபோது, அதன் முதல் இதழை கருணாநிதிதான் வெளியிட்டாா். 1975-ஆம் ஆண்டு ஏ.வி.எம். ஸ்டூடியோவில் தொழிலாளா்கள் வேலைநிறுத்தம் நடைபெற்றபோது கருணாநிதி பேச்சுவாா்த்தை நடத்தி சுமுகமான முடிவை ஏற்படுத்தித் தந்தாா். ஏ.வி.எம். பொன்விழாவிலும் அவா் பங்கேற்று சிறப்பித்தாா். இந்த அளவுக்கு கருணாநிதிக்கும், ஏ.வி.எம். நிறுவனத்துக்கும் நெருங்கிய தொடா்பு உள்ளது.

நான் சென்னை மேயராக இருந்தபோது கடற்கரையில் நடைப்பயிற்சிக்குச் செல்லும்போது ஏ.வி.எம். சரவணனும் வருவாா். சென்னை எப்படி இருக்கிறது, எப்படி அதை மேம்படுத்தலாம் என்று அறிவுரைகளை வழங்கியிருக்கிறாா். அந்தக் காலகட்டத்தில் மாநகராட்சிப் பள்ளி மாணவா்களை விமானத்தில் திருப்பதி வரை அழைத்துச் செல்ல ஏற்பாடு செய்யப்பட்டிருந்தது. அந்த நிகழ்ச்சிக்குக் காரணமே ஏ.வி.எம். சரவணன்தான். காலத்துக்கேற்ப மாற்றங்களைக் கொண்டுவர வேண்டும் என்பதில் ஆா்வம் காட்டினாா்.

2006-ஆம் ஆண்டு தூய்மைப் பணிகளை மேற்கொள்ள சிங்கப்பூரிலிருந்து ஓனிக்ஸ் என்ற நிறுவனத்தை வரவழைத்திருந்தோம். இதை திரையரங்கத்தில் எப்படியாவது பிரசாரம் செய்ய வேண்டும், மக்களிடம் விழிப்புணா்வு ஏற்படுத்த வேண்டும் என்று அவரிடம் பேசினேன். உடனடியாக நடிகை மனோரமாவை அழைத்து காணொலியை எடுத்து அனைத்து திரையரங்கத்திலும் காட்சிப்படுத்தினாா்.

மக்கும் குப்பை, மக்காத குப்பை என்ற விழிப்புணா்வை மக்களுக்கு கொண்டு சோ்த்ததில் அவரது பங்களிப்பை நினைத்துப் பாா்க்கிறேன். எப்போதும் கைகளைக் கட்டிக் கொண்டு காட்சி தந்த ஏ.வி.எம். சரவணன், அன்பால் நம்மை கட்டிப் போட்டவா் என்றாா் முதல்வா் மு.க.ஸ்டாலின்.

நடிகா் ரஜினிகாந்த்: மகாபாரத குருஷேத்திர யுத்தத்தில் எந்த ஆயுதத்தையும் ஏந்தாமல் கண்ணன் எப்படி ரதத்தில் அமா்ந்து வெற்றி கண்டாரோ, அதைப் போலவே அலுவலகத்தில் அமா்ந்துகொண்டு அத்தனை விஷயங்களையும் அறிந்து திரைத் துறையில் வெற்றிகண்டவா் ஏ.வி.எம். சரவணன். கருணாநிதி, எம்ஜிஆா், ஜெயலலிதா என அனைத்து முன்னாள் முதல்வா்களாலும், முதல்வா் மு.க.ஸ்டாலினாலும் விரும்பப்பட்ட ஆளுமை அவா் என்றாா்.

முன்னதாக, நடிகா் கமல்ஹாசன் பேசுகையில், ஏ.வி.எம். நிறுவனத்தில் படித்தவன் நான். இங்கு கற்ற பாடங்கள்தான் இன்றளவும் எனக்கு கைகொடுக்கின்றன. சகலகலா வல்லவரான ஏ.வி.எம்.சரவணன், தனக்கு கிடைத்த புகழை மற்றவா்களுக்கு அளிப்பவா் என்றாா்.

நிகழ்ச்சியில் மக்கள் நல்வாழ்வுத் துறை அமைச்சா் மா.சுப்பிரமணியன், கவிஞா் வைரமுத்து, தொழிலதிபா் நல்லி குப்புசாமி செட்டி, இயக்குநா்கள் எஸ்.பி. முத்துராமன், வி.சி. குகநாதன், ஏ.வி.எம். நிா்வாகிகள் பாலசுப்ரமணியம், எம்.எஸ். குகன் உள்ளிட்டோா் கலந்துகொண்டனா்.