கணவருடன் கை கோர்த்து
காதவழி  நடந்தாலும்
களைப்பு தெரிவதில்லை
களிப்பு குறைவதில்லை!

காவியத்தலைவி கண்ணகி
கணவன் கோவலுடன்
பாண்டியநாடு நோக்கி
பாங்காய்க் கை கோர்த்தாளே!

தொழிலாளர் கை கோர்த்தே
தொழிற் புரட்சி  தொடங்கிற்று!
விவசாயி கை கோர்த்தால்தான்
வீட்டிற்குள் உணவு வரும்!

அமைதியான    வாழ்வு    வேண்டி
நாம் அனைவருமே கை கோர்ப்போம்!
பகைமை  தனை  விட்டொழித்து
பண்புடனே கை கோர்ப்போம்!

எல்லா மனிதருமே இனிதான உறவென்று
உள்ளம் நிறைந்து உறுதியாய்க் கைகோர்ப்போம்!
பள்ளத்து மனிதர்களும் பக்குவமாய் முன்னேற
பாகுபாடு பாராமல் பலமாய்க் கைகோர்ப்போம்!