உடன்அமர் காதல் மகளிர் திருமகள், மண்மகள், ஆயர்
மடமகள் என்றுஇவர் மூவர், ஆளும் உலகமும் மூன்றே,
உடன் அவை ஒக்க விழுங்கி ஆல்இலை சேர்ந்தவன், எம்மான்,
கடல்மலி மாயப்பெருமான், கண்ணன் என் ஒக்கலையானே.

எம்பெருமானுடன் அமர்ந்திருக்கும் காதல் மனைவியர் மூவர்: திருமகள், நிலமகள், ஆயர்குலத்தில் பிறந்த இளமகளான நப்பின்னை. எம்பெருமான் ஆளும் உலகங்களும் மூன்றே. முன்பு அவன் அந்த மூன்று உலகங்களையும் ஒரே நேரத்தில் விழுங்கிவிட்டு ஆலிலையில் துயில் கொண்டான். என் தலைவன், கடலைவிடப்பெரிய குணங்களைக் கொண்டவன், மாயப்பெருமான், கண்ணன், என் இடுப்பில் தங்கியிருக்கிறானே.