இளவரசர் சார்லஸ் மனைவிக்கு ராணி பட்டம்!

இங்கிலாந்து நாட்டில் ராணியாக இருப்பவர், 2-ஆம் எலிசபெத் மகாராணி வயது 95 ஆகும்.

இங்கிலாந்து மன்னராக இருந்த ஆறாம் ஜார்ஜின் மகள் இவர். மன்னர் ஆறாம் ஜார்ஜ், 1952-ஆம் ஆண்டு மறைந்த பின்னர், 2-ஆம் எலிசபெத் ராணி பட்டத்துக்கு வந்தார். அப்போது அவருக்கு வயது 25.

அவர் ராணி பட்டத்துக்கு வந்து 70 ஆண்டுகள் ஆகின்றன. எலிசபெத் மகாராணி தான் பட்டத்துக்கு வந்ததின் 70-ஆவது ஆண்டு விழாவை சாண்ட்ரிங்ஹாம் தோட்டத்தில் கொண்டாடினார். தொடர்ந்து அவர் நாட்டு மக்களுக்கு செய்தியும்விடுத்தார்.

அந்த செய்தியில், "உங்கள் அனைவரின் ஆதரவுக்காகவும் நான் எனது நன்றியைத் தெரிவித்துக் கொள்கிறேன்' என்றார்.

இவர் ராணி என்ற அந்தஸ்தில் இங்கிலாந்தில் 14 பிரதமர்களை பார்த்திருக்கிறார். இவர், பட்டத்துக்கு வந்த 70 ஆண்டுகள் ஆகியுள்ள இந்த தருணத்தில், எதிர்காலத்தில் ராணி பட்டம் யாருக்கு என்பதை அவர் கைகாட்டி உள்ளார்.

இதையொட்டி அவர் குறிப்பிடுகையில், "சார்லஸ் மன்னர் ஆகிறபோது ராணி பட்டத்தை கமிலா பெற வேண்டும் என்பது எனது உண்மையான விருப்பம்' என தெரிவித்தார். தற்போதைய இளவரசர் சார்லஸ் இங்கிலாந்தில் மன்னர் பட்டம் ஏற்கிறபோது கமிலாவுக்கு ராணி பட்டம் வந்து சேரும்.

2-ஆம் எலிசபெத் மகாராணியின் இந்த அறிவிப்புக்கு இளவரசர் சார்லசும், இளவரசி கமிலாவும் நன்றி தெரிவித்துக் கொண்டு உள்ளனர்.

சார்லஸ் மன்னரானாலும் கமிலா கன்சார்ட் இளவரசி என்றே அழைக்கப்படுவார் எனவும் கூறப்பட்டது.

இப்போது 2-ஆம் எலிசபெத் மகாராணியே கமிலாவை ராணி என அழைக்கவே விருப்பம் என்று கூறிவிட்டதால் இனி அவர் ராணி பட்டம் பெறுவதில் பிரச்னை ஏதும் இருக்காது.