பலவிதமான உணவுகளால் நமது உடலில் கலோரிகளின் எண்ணிக்கை கூடிக் கொண்டே போகிறது. உடலைப் பராமரிக்க ஆசைப்படுவர்கள் இன்று அதிகம். அவர்களுக்கு கலோரியைக் குறைக்க சில யோசனைகள் தரப்பட்டுள்ளன. இவற்றில் எதை முடியுமோ அதை மேற்கொண்டு,  உடலை பேணிப் பாதுகாக்கலாம்:

நடைப்பயிற்சி: 45 நிமிடங்கள் நடைப்பயிற்சி செய்தால் 150 கலோரி இழப்பு ஏற்படும். அதே சமயம் ரத்தம் எளிதில் சுற்றி வரவும் உதவும். இதய ஆரோக்கியமும் மேம்படும்.

வேக நடைப்பயிற்சி: 30 நிமிடங்கள் வேகமாக நடந்தால், 250 கலோரி இழப்பு நிச்சயம். வாரத்துக்கு 3 நாள்கள் இப்படி வேக நடைப்பயிற்சி செய்தால், உடலில் நல்ல கலோரி இழப்பை உண்டாக்கும்.

சமையறைப் பயிற்சிகள்: பல பெண்கள் சமையல் அறையிலேயே உடற்பயிற்சியை கைகாலை ஆட்டி செய்வர். இப்படி 30 நிமிடங்கள் செய்தால், 150-250 கலோரி இழப்பு ஏற்படும். 

சைக்கிள் பயிற்சி: ஒரு மணி நேரம் சைக்கிள் ஓட்டினால் 600 கலோரி இழப்பு ஏற்படும். மூட்டுகளும் சதை பிடிப்பின்றி இயல்பாக இயங்க உதவும். நம்மை டிரிம்மாகவும் மாற்றும்.

விளையாடுதல்:  பிடித்து.. ஓடியாடி,. துள்ளி விளையாடினால் 30 நிமிடங்களில் 100 கலோரியை இழக்கலாம். 

ஓடுதல்: 30 நிமிடங்களில் 300 கலோரியை எரிக்கலாம். தொடர்ந்து ஓடுவதால் மட்டுமே சாத்தியம். வெறும் 100 மீட்டர் ஓடி நிறுத்தினால், 6 கலோரி மட்டுமே குறையும்.

தோட்ட வேலை: ஒரு மணி நேரம் தோட்ட வேலை செய்தால், 300 கலோரி எரிந்து விடும். தண்ணீர் ஊற்றுதல் போன்றவற்றை செய்தால், 500 கலோரி வரை குறையும். 

டென்னிஸ்: 30 நிமிடங்களில் 250 கலோரி எரிய உதவும். சதைகள் வலுவடைவதும் மூளைக்கும் அமைதி கிடைக்கும்.

யோகா: ஒரு மணி நேரம் தொடர்ந்து பயிற்சி மேற்கொண்டால், 250 கலோரியை இழக்கலாம். ரத்த அழுத்தத்தைக் குறைக்கும். கை, கால் உள்பட அனைத்து உறுப்புகளும் சொன்னதைக் கேட்கும்.

அதிவேகப் பயிற்சி: 30 நிமிடம் செய்தால், 220 கலோரியை இழக்கலாம். கொழுப்பும் எரிந்து, அலர்ட்டாக உடலை வைத்திருக்கலாம்.