அடுப்பறை அலப்பறை...

'அத்தே... பக்கத்து வீட்டு விமலா அவ பொண்ணுக்கு நூறு பவுன் போடுறாளாம்'

'அப்படியா?'

'ஆமாம்... அசல் அஞ்சு பவுனாம்... கவரிங் 95 பவுனாம்!'

-அ.சுஹைல் ரஹ்மான், திருச்சி.



'நேத்து ராத்திரி பேயைப் பார்த்தேன்டி...'

'சட்டுன்னு ஒரு செல்பி எடுக்க வேண்டியதுதானே!'

-ஏ.மூர்த்தி, புல்லரம்பாக்கம்.



'எத்தனையோ பொண்ணுங்க பார்த்தாச்சு... என் அம்மாவுக்குப் பிடிக்கலை!'

'உன் அம்மா மாதிரியே பொண்ணு பார்க்க வேண்டியதுதானே..?'

'பார்த்தேனே... என் அப்பாவுக்குப் பிடிக்கலையே!'

-எம்.அசோக்ராஜா, அரவக்குறிச்சிப்பட்டி.



'ஏன் உன் மருமகளை தனிக்குடித்தனம் அனுப்பிட்டே..?'

'தினமும் ரீல்ஸ் போடுறேன்னு சொல்லி, அவளும் நடிச்சு, என்னையும் சேர்த்து நடிக்க வைத்துக் கொடுமைப்படுத்துறாளே!'



'எதிர்வீட்டுக்காரங்க கல்யாணத்துல கொடுத்த தாம்பூலப் பையில என்ன தேடிட்டு இருந்தீங்க?'

'கொடுத்த மொய் பணத்துக்கு சமமா ஏதாவது கிஃப்ட் இருக்கான்னு பார்த்தேன்...'



'கையில மருதாணியை வெச்சிட்டே தோசை சுட்டியா?'

'அத்தே எப்படிக் கண்டுபிடிச்சீங்க?'

'தோசையில் மருதாணி மணம் வீசுதே..'

-இந்து குமரப்பன், விழுப்புரம்.