மனிதத் தோற்றம் ஒன்றே!

கருப்புப் பசு வெள்ளைப் பசு

சிவப்புப் பசு உண்டு;- ஆனால்

கறக்கும் பாலின் வெண்மை நிறம்

ஒன்றே யன்றோ தம்பீ!

அரும்பூக்களில் அரளி, குவளை

வகைகள் பல உண்டு;- ஆனால்

அவற்றின் தேனில் தித்திக்கும் சுவை

ஒன்றே யன்றோ தம்பீ!

பறவையினத்தில் கொக்கு, நாரை

பருந்து, ஆந்தை உண்டு - ஆனால்

பறக்கச் சிறகை விரிக்கும் வழக்கம்

ஒன்றே யன்றோ தம்பீ!

உறங்கும் நாய்க்கும் உறுமும் புலிக்கும்

உருவபேதம் உண்டு;- ஆனால்

உயிரைக் காக்கும் சுவாசக்காற்று

ஒன்றே யன்றோ தம்பீ!

நாடு வேறு, மதங்கள் வேறு,

இனங்கள் வேறு நம்மில்;- ஆனால்

நமக்கமைந்த மனிதத்தோற்றம்

ஒன்றே யன்றோ தம்பீ!

கேடுகெட்ட பேதம் பேசி

பகைவளர்த்தல் தவிர்ப்போம்;- தம்பீ

கீழ்மை வீழ்த்தி மேன்மை வாழ்த்தி

ஒன்றுகூடி உவப்போம்!