கீரை!

கீரை நல்ல கீரை

கேடு செய்யாக் கீரை

சீரை வளர்க்கும் கீரை

செலவு குறைந்த கீரை

பறிக்கப் பறிக்கத் தளிர்க்கும்

பச்சை வண்ணக் கீரை

செறிந்த உணவுக் கீரை

எளிதில் செரிக்கும் கீரை

சத்து மிகுந்த கீரை

உண்ணச் சுவைக்கும் கீரை

மத்து கொண்டு கடைந்தால்

மசியும் வெந்த கீரை

வல்லாரை அகத்தி முருங்கை

மணக்குந் தக்காளி சிறுகீரை

நல்ல பசலை முளைக்கீரை

நாடும் பொன்னாங்கண்ணி

வித விதமாய் கீரைக்கட்டைத்

தெருவில் கூவி விற்பர்!-அதனை

வாங்கி உண்டால் அறிவும் உடலும்

சக்தி கூடி வளரும்!

வீட்டில் தோட்டம் போட்டு

வேண்டும் கீரை வளர்ப்போம்!

பாட்டி கையால் பறித்துப்

பாங்காய்ச் சமைத்துத் தின்போம்!

உணவில் கீரை சேர்த்து

உடம்பில் வலுவைக் கூட்டு

பிணக்கம் கொள்ள வேண்டாம்

பெரியோர் கண்ட உண்மை!