ஆல் போல் வாழணும்!

மலையைப் போல ஆல மரமும் 
அழகாய்த் தோன்றுதே! - அது 
தலைக்கு மேலே கிளைகளை விரித்து 
குடை போல் நிற்குதே!

சுட்டுப் பொசுக்கும் வெயிலைத் தாங்கி 
நிழலைக் கொடுக்குது! - மழை 
கொட்டும்போது நனைந்திடாமல் 
குடையாய்க் காக்குது!

தன்னை நாடிப் பறந்து வரும் 
பறவைகள் அனைத்துமே 
தங்கிக்கொள்ளக் கிளைகள் விரித்து 
இடத்தைக் கொடுக்குதே!

குட்டிக் குட்டி ஆலம் பழங்கள்
மிகவும் இனிக்குது! - அவற்றைக் 
கொத்திக் கொத்தி பறவைகள் தின்று 
பசியைப் போக்குதே!

ஆல இலையும் ஆடு தின்ன 
உணவாய் ஆனதே! - பல்லும் 
ஆலம் விழுதால் துலக்கி வந்தால் 
உறுதி ஆகுமே!

சிறுவர் ஊஞ்சல் ஆட உதவும் 
சிறிய கிளைகளே! - பெரிய 
விழுதுகள் தரையில் ஊன்றி நன்றாய்
மரத்தைத் தாங்குமே!

வாழ்ந்தால் ஆல மரத்தைப் போல 
வாழ வேண்டுமே! - நாம் 
வாழ்ந்ததைப் பற்றிப் பலரும் போற்றிப் 
புகழ வேண்டுமே!