பொங்கல் வந்தால் என்ன வரும்?
புத்தம்புதிய நெல்லு வரும்!
நெல்லை அரைத்தால் என்ன வரும்?
நன்றாகப் பச் சரிசி வரும்!

அரிசி பின்னால் என்ன வரும்?
அச்சுக் குலையா வெல்லம் வரும்!
வெல்லம் வந்தபின் என்ன வரும்?
வெள்ளை உள்ளத் தேங்காய் வரும்!

தேங்காய் கூட என்ன வரும்?
தித்திக்கின்ற கரும்பு வரும்!
கரும்பின் அருகில் என்ன வரும்?
கொத்தாய் இருக்கும் மஞ்சள் வரும்!

மஞ்சளை அடுத்து என்ன வரும்?
மலர்களைத் தொடுத்த கதம்பம் வரும்!
ஏலம், சுக்கு, இஞ்சி வரும்!
இவற்றை நெய், பால், மிஞ்சி வரும்!

வாழைப் பழமும் இலையும் வரும்!
வாசலில் கோலக் கலையும் வரும்!
பொங்கலோ பொங்கல் ஓசை வரும்!
பொங்கலைத் திங்க ஆசை வரும்!

மஞ்சு விரட்டுக் காளை வரும்!
மாடுகள் ஓடும் வேளை வரும்!
தை...தை... என்று மாதம் வரும்!
தமிழ்நாடெங்கும் மகிழ்ச்சி தரும்!

பொதுமைப் பித்தன்