காபூல் விமான நிலையத்தை சுற்றியுள்ள வாயில்களிலிருந்து உடனடியாக வெளியேற அமெரிக்கா மக்களுக்கு மீண்டும் வலியுறுத்தியுள்ளது.

தலிபான்கள் ஆட்சியிலிருந்து தப்பிக்க காபூல் விமான நிலையத்தில் குவிந்திருந்த மக்கள் மீது தற்கொலை படை தாக்குதல் நடத்தப்பட்ட நிலையில், விமான நிலையத்தை சுற்றியுள்ள வாயில்களிலிருந்து உடனடியாக  வெளியேறும்படி மக்களுக்கு அமெரிக்கா வலியுறுத்தியுள்ளது.

அமெரிக்கர்கள் மற்றும் கூட்டு நாடுகளின் மக்கள் ஆபத்து நிறைந்த காபூல் விமான நிலையத்திலிருந்து மீட்கப்பட்டுவருவதாகவும் தற்போது மீண்டும் நம்பகத்தகுந்த வட்டாரங்களிலிருந்து பயங்கரவாத அச்சுறுத்தல் வந்துள்ளதாகவும் பென்டகன் முன்னதாக தகவல் வெளியிட்டிருந்தது.

காபூலில் உள்ள அமெரிக்க தூதரகம் வெளியிட்ட அறிக்கையில், "அபே கேட், கிழக்கு கேட், வடக்கு கேட், உள்துறை அமைச்சகத்தின் புதிய கேட் அருகே உள்ள அமெரிக்கர்கள் உடனடியாக அங்கிருந்து வெளியேற வேண்டும். காபூல் விமான நிலையத்திற்கு பயங்கரவாத அச்சுறுத்தல் விடுக்கப்பட்டுள்ளதால், விமான நிலையத்திற்கோ அதை சுற்றியுள்ள வாயில்களுக்கோ வர வேண்டாம் என அறிவுறுத்துகிறோம்" எனக் குறிப்பிடப்பட்டுள்ளது.

இதையும் படிக்க | பழிக்குப் பழி: ஆப்கனில் ஐ.எஸ். பயங்கரவாதிகளை குறிவைத்து அமெரிக்கா ட்ரோன் தாக்குதல்

காபூல் விமான நிலையத்தில் வியாழக்கிழமை நடைபெற்ற தற்கொலை படை வெடிகுண்டு தாக்குதலில் அமெரிக்க ராணுவத்தை சேர்ந்த 13 பேர் கொல்லப்பட்டனர்.