பிரிட்டன் நாடாளுமன்ற கீழ் அவையில் எம்பி ஒருவர் ஆபாச படம் பார்த்ததாக குற்றச்சாட்டு எழுந்துள்ளது. தங்களுக்கு நேர்ந்த பாலின பாகுபாடு, பாலியல் சீண்டல்கள் குறித்து பெண் எம்பிக்கள் பகிர்ந்து கொண்டிருந்தனர். அப்போது, அந்த கூட்டத்தில் கலந்து கொண்ட பெண் அமைச்சர் இந்த குற்றச்சாட்டை முன்வைத்தார். 

பார்த்தவரின் பெயர் வெளியிடப்படாத நிலையில், குறிப்பிட்ட எம்பி ஆபாச படத்தை பார்த்து கொண்டிருப்பதை அவர் பின் அமர்ந்திருந்த தான் பார்த்ததாக பெண் அமைச்சர் கூறியுள்ளார். இந்த சம்பவம் கடந்த வாரம் தேர்வு குழு கூட்டத்தில் நடைபெற்றதாக தி டைம்ஸ் செய்தி வெளியிட்டுள்ளது.

பெண் எம்பிக்கள் கலந்து கொண்ட கூட்டத்தில் பேசிய மற்றொரு எம்பி, "ஒரு ஆண் எம்பி பல முறை ஆபாச படம் பார்த்ததை நானும் பார்த்திருக்கிறேன். அவர் பார்ப்பதை புகைப்படம் எடுக்கு முயற்சி செய்தேன். ஆனால், முடியவில்லை" என்றார்.

இதையும் படிக்க | நீங்கள் வரியை கூட்டியபோதெல்லாம் கூட்டியிருந்தால் இப்போது குறைக்கலாம்: பழனிவேல் தியாகராஜன்...

இதுகுறித்து கன்சர்வேட்டிவ் கட்சி எம்பி பாலின் லாதம் பிபிசியிடம் பேசுகையில், "கூட்டத்தில் இருந்த பல எம்பிக்கள் அதிர்ச்சி அடைந்தனர். தொழில் முறை சார்ந்த இடத்தில் இப்படி நடக்கும் என்பதை எங்களால் நம்ப முடியவில்லை. இந்த குற்றச்சாட்டுகள் நிருபிக்கப்படும் பட்சத்தில் அவர் எம்பி பதவியிலிருந்து நீக்கப்படுவார். கன்சர்வேட்டிவ் கட்சியிலிருந்தும் நீக்கப்படுவார்" என்றார்.

பிரிட்டன் நாடாளுமன்றத்தில் பாலின பாகுபாடு, பெண்களுக்கு எதிரான வன்முறை பற்றிய சம்பவங்கள் சர்ச்சையை கிளப்பியுள்ளன. தொழிலாளர் கட்சியின் துணை தலைவர் ஏஞ்சலா ரெய்னர், பிரிட்டன் பிரதமர் போரிஸ் ஜான்சன் பேசும்போது தனது கால்கள் மூலம் அவரின் கவனத்தை ஈர்க்க முயற்சி செய்த சம்பவம் பெரும் விமர்சனங்களை பெற்றுள்ளன.