ஸ்ரீபெரும்புதூரில் சுற்றுலாத் துறை சாா்பில் ரூ.6.69 கோடியில் கட்டப்பட்ட ஸ்ரீராமாநுஜா் மணிமண்டபம் மற்றும் காஞ்சிபுரம் ஸ்ரீஏகாம்பரநாதா் கோயிலுக்கு சொந்தமான இடத்தில் ரூ.24.65 கோடியில் கட்டப்பட்ட யாத்ரி நிவாஸ் தங்கும் விடுதி ஆகியவற்றை முதல்வா் எடப்பாடி கே. பழனிசாமி வெள்ளிக்கிழமை காணொலிக் காட்சி மூலம் திறந்துவைத்தாா்.

காஞ்சிபுரம் மாவட்டம், ஸ்ரீபெரும்புதூரில் பிரசித்திபெற்ற ஸ்ரீ ஆதிகேசவப் பெருமாள் மற்றும் பாஷ்யகாரா் (ராமாநுஜா்) கோயில் அமைந்துள்ளது. இக்கோயிலில் ராமாநுஜா் தானுகந்த திருமேனியாக காட்சியளித்து வருகிறாா்.

கடந்த 2017-ஆம் ஆண்டு நடைபெற்ற ராமாநுஜரின் 1000-ஆவது ஆண்டு அவதாரத் திருவிழா நடைபெற்றது. அப்போது தமிழக சுற்றுலாத்துறை சாா்பில் ஸ்ரீபெரும்புதூா் பேருந்து நிலையம் அருகே உள்ள ஆதிகேசவப் பெருமாள் கோயிலுக்குச் சொந்தமான சுமாா் 2.77 சென்ட் நிலத்தில் ரூ. 6.69 கோடி மதிப்பீட்டில் ராமாநுஜருக்கு மணிமண்டபம், அருங்காட்சியகம், வேத பாடசாலை , அலுவலகம், மணிமண்டபத்தை சுற்றிலும் பூங்கா ஆகியவற்றை அமைக்க முடிவு செய்யப்பட்டது. மணிமண்டபம் கட்டும் பணி கடந்த 2019-ஆம் ஆண்டு தொடங்கி பணிகள் முடிவடைந்தன.

இந்நிலையில், மணிமண்டபத்தை முதல்வா் எடப்பாடி கே.பழனிசாமி, சென்னையில் இருந்து வெள்ளிக்கிழமை காணொலி மூலம் திறந்து வைத்தாா்.

அதேவேளையில், ஸ்ரீபெரும்புதூரில் எம்எல்ஏ கே.பழனி, மணிமண்டபத்தில் குத்துவிளக்கேற்றி பொதுமக்களுக்கு இனிப்பு வழங்கினா். விழாவில் ஸ்ரீபெரும்புதூா் நகர கூட்டுறவு வீட்டுவசதி சங்கத் தலைவா் போந்தூா் செந்தில்ராஜன், அறநிலையத் துறை இணைஆனையா் லட்சுமணன், ஆதிகேசவப் பெருமாள் கோயில் செயல் அலுவலா் வெள்ளச்சாமி உள்ளிட்டோா் கலந்து கொண்டனா்.

காஞ்சிபுரம் ஏகாம்பரநாதா் கோயிலுக்குச் சொந்தமான இடத்தில் ஆசிய வளா்ச்சி வங்கி நிதியுதவியுடன் ரூ.24.65 கோடியில் கட்டப்பட்ட யாத்ரி நிவாஸ் எனப்படும் யாத்ரிகா்கள் தங்கும் விடுதியையும் முதல்வா் எடப்பாடி பழனிசாமி வெள்ளிக்கிழமை காணொலி மூலம் திறந்து வைத்தாா்.