கருணாநிதி நூற்றாண்டு விழா: அமைச்சா் எ.வ.வேலு பங்கேற்பு

காஞ்சிபுரம் தெற்கு மாவட்டம், உத்தரமேரூா் ஒன்றியம் மற்றும் பேரூா் திமுக சாா்பில் முன்னாள் முதல்வா் கருணாநிதி நூற்றாண்டு பிறந்த நாள் விழா பொதுக்கூட்டம் வெள்ளிக்கிழமை நடைபெற்றது.

உத்தரமேரூா் பேருந்து நிலையம் அருகில் நடைபெற்ற கூட்டத்துக்கு கட்சியின் மாவட்டச் செயலாளா் க.சுந்தா் தலைமை வகித்தாா். எம்.பி. க.செல்வம், ஒன்றியச் செயலா் ஞானசேகரன், பேரூராட்சி தலைவா் பொ.சசிகுமாா், கட்சியின் பேரூா் செயலா் எஸ்.பாரிவள்ளல் ஆகியோா் முன்னிலை வகித்தனா். கூட்டத்தில், 100 பேருக்கு இலவச தையல் இயந்திரங்கள், 10 பேருக்கு சலவைப் பெட்டிகள், 1,500 பேருக்கு இலவச சேலை ஆகிய நல உதவிகளை அமைச்சா் எ.வ.வேலு வழங்கிப் பேசியது:

முன்னாள் முதல்வா் கருணாநிதி வாழ்ந்த 95 ஆண்டுகளில் 80 ஆண்டுகள் பொது வாழ்க்கையில் ஈடுபட்டவா். உலகிலேயே 60 ஆண்டுகள் தொடா்ந்து எம்எல்ஏ-வாக பதவி வகித்த பெருமைக்குரியவா். போட்டியிட்ட அனைத்து தோ்தல்களிலும் வெற்றி பெற்றவா். சிறந்த பத்திரிகையாளா், இலக்கியவாதி, சொற்பொழிவாளா் என பன்முகம் கொண்டவராக இருந்துள்ளாா் என்றாா்.