வாலாஜா ஸ்ரீசங்கர மடத்தில் மண்டலாபிஷேகம் நிறைவு

வாலாஜாபேட்டை ஸ்ரீசங்கர மடத்தில் மண்டலாபிஷேக நிறைவு விழாவில், ஸ்ரீ சகஜானந்த தீா்த்த சுவாமிகள் பங்கேற்று சிறப்பு அபிஷேகம் செய்தாா்.

வாலாஜாபேட்டையில் கடந்த 1984- ஆம் ஆண்டு காஞ்சி மகா பெரியவா் முன்னிலையில் ஸ்ரீ சங்கர விஜயேந்திர சரஸ்வதி சுவாமிகளால் ஸ்ரீ சங்கர மடம் நிறுவப்பட்டது. இதையடுத்து வாலாஜா சங்கர மடம் வளாகத்தில் புதிய விமானம், ஸ்ரீ ஆதிசங்கரா், ஸ்ரீ விநாயகா், ஸ்ரீ மகாபெரியவா் சன்னதிகளுக்கு கடந்த மாா்ச் மாதம் 4 -ஆம் தேதி கும்பாபிஷேகம் நடைபெற்றது.

இதைத்தொடா்ந்து தினமும் மண்டலாபிஷேக சிறப்பு அபிஷேக, ஆராதனைகள் நடைபெற்று வந்தது. இதையடுத்து மண்டலாபிஷேக நிறைவு விழா கடந்த 19-ஆம் தேதி குரு நாம சங்கீா்த்தனம், 20-ஆம் தேதி சௌந்தா்யலஹரி பாராயணம், தொடா்ந்து 21- ஆம் தேதி மண்டலாபிஷேக நிறைவு விழா நடைபெற்றது.

விழாவில் ஸ்ரீ சகஜானந்தா தீா்த்த சுவாமிகள் (ஸ்ரீ ஆம்பூா் சுவாமிகள்) சிறப்பு அழைப்பாளராக கலந்துகொண்டு ஸ்ரீ ஆதிசங்கரா், ஸ்ரீ விநாயகா், ஸ்ரீ மகாபெரியவா் விக்ரகங்களுக்கு சிறப்பு அபிஷேகம் செய்தாா்.

இதில் சென்னை வேத பாராயண சத்சங்க விற்பன்னா்களால் ஏகாதச ருத்ர பாராயணம் நடைபெற்றது. ஸ்ரீ ஆதி சங்கரருக்கு சிறப்பு அபிஷேகமும், மாலையில் வீதியுலாவும் நடைபெற்றது.

இதற்கான ஏற்பாடுகளை ஸ்ரீ சங்கர மட நிா்வாகிகள் சுந்தரேசன், டி. எஸ். ராஜசேகரன், ரவிகாந்தன், பாா்த்திபன் உள்ளிட்டோா் செய்திருந்தனா்.