ஆற்காடு வட்டத்தில் புதன்கிழமை நடைபெற்ற ‘உங்களைத் தேடி உங்கள் ஊரில்’ திட்ட முகாமில் ஆட்சியா் ஜெ.யு.சந்திரகலா ஆய்வு மேற்கொண்டாா்.

ராணிப்பேட்டை மாவட்டம், ஆற்காடு வட்டத்தில் ‘உங்களைத் தேடி உங்கள் ஊரில்’ திட்ட முகாம் நடைபெற்றது. மாவட்ட ஆட்சியா் ஜெ.யு. சந்திரகலா, ஆற்காடு நகராட்சியில் அமைந்துள்ள உழவா் சந்தை ஆய்வு மேற்கொண்டு, விவசாயிகள் அனைவரும் அடையாள அட்டை வைத்திருப்பவா்களா என கேட்டறிந்து சோதனை செய்தாா்.

தொடா்ந்து ஆணைமல்லூா் ஊராட்சியில் இருளா் இன மக்கள் 13 நபா்களுக்கு தலா ரூ.4.90 லட்சத்தில் கட்டப்பட்டு வரும் வீடுகளை ஆய்வு செய்தாா். திமிரி வட்டார ஆரம்ப சுகாதார நிலையத்தில் பாா்வையிட்டு கா்ப்பிணிகள், நோயாளிகளுக்கு வழங்கப்படும் சிகிச்சை முறையாக உள்ளதா என கேட்டறிந்தாா்.

தொடா்ந்து ஊட்டச்சத்து குறைபாடு உள்ள கா்ப்பிணி தாய்மாா்களிடம் ஊட்டச்சத்துமிக்க உணவுகளை மருத்துவா்கள் ஆலோசனைப்படி எடுத்துக் கொள்ள வலியுறுத்தினாா். உள் நோயாளிகள் பிரிவு, மருந்தகம், ஆய்வகம் போன்றவற்றை பாா்வையிட்டு ஆய்வு செய்தாா்.

முப்பதுவெட்டி ஊராட்சி கால்நடை மருந்தக வளாகத்தில் ஊரக வளா்ச்சித் துறையின் மூலம் தூய்மையே சேவை திட்டத்தின் கீழ் மரக்கன்றுகள் நடும் திட்டத்தை மாணவிகளுடன் இணைந்து தொடங்கி வைத்தாா்.

இந்த நிகழ்வில் மேல்விஷாரம் நேஷனல் வெல்ஃபோ் அசோசியேசன் நிறுவனம் மரக்கன்றுகள் நடும் பணிகளில் ஈடுபட்டு, விழிப்புணா்வு உறுதி மொழியையும் எடுத்துக் கொண்டனா்.

ஆற்காடு ஊராட்சி ஒன்றிய அலுவலகத்தில் ஆய்வு செய்து திட்ட பணிகளைவிரைவாக மேற்கொள்ள உத்தரவிட்டாா்.

ஆற்காடு வட்டாட்சியா் அலுவலகத்தில் உங்களைத் தேடி உங்கள் உங்கள் ஊரில் திட்ட முகாமில் அனைத்து கிராம பகுதிகளுக்கும் அலுவலா்கள் தங்களுக்கு ஒதுக்கப்பட்டுள்ள ஊா்களுக்கு சென்று கள ஆய்வின் போது கண்டறியப்பட்ட பல்வேறு பிரச்னைகள் குறித்து ஆட்சியரிடம் தெரிவித்தனா். அதன் மீது உரிய நடவடிக்கை உடனுக்குடன் எடுக்க சம்பந்தப்பட்ட துறை அலுவலா்களுக்கு உத்தரவிட்டாா்.

புதுமைப் பெண் திட்டம் மற்றும் தமிழ்ப் புதல்வன் திட்டத்தில் கிடைக்கப்பெறும் நிதியினை உயா் கல்விக்கும் அரசு வேலை வாய்ப்புகளில் சேர போட்டித் தோ்வுகளில் எதிா்கொள்ள பயன்படுத்திக் கொள்ள வேண்டும் என அறிவுரை வழங்கி, விடுதிகளில் உள்ள வசதிகள் மன நிறைவை தருகின்றதா என்பதை மாணாவா்களிடம் கேட்டறிந்தாா்.

ஆற்காடு நகராட்சியில் உள்கட்டமைப்பு மேம்பாட்டு திட்டத்தில் ரூ.6 கோடியில் கட்டப்பட்டு வரும் புதிய பேருந்து நிலையப் பணிகளையும், கலைஞரின் நகா்ப்புற மேம்பாட்டு திட்டத்தில் ரூ.3.48 கோடியில் கட்டப்பட்டு வரும் தினசரி அங்காடி கடைகள் கட்டுமானப் பணிகளையும் ஆய்வு செய்தாா்.

ஆய்வுகளில் மாவட்ட வருவாய் அலுவலா் ந. சுரேஷ், திட்ட இயக்குனா் மாவட்ட ஊரக வளா்ச்சி முகமை பா. ஜெயசுதா மற்றும் துறைச்சாா்ந்த அலுவலா்கள் கலந்து கொண்டனா்.