இணையதள தொழில்நுட்பக் கோளாறுகள்: விரைவில் சரி செய்ய நடவடிக்கை

திருமலை திருப்பதி தேவஸ்தான இணையதளத்தில் தரிசன டிக்கெட் முன்பதிவில் ஏற்படும் தொழில்நுட்பக் கோளாறுகளை விரைவில் சரிசெய்ய நடவடிக்கை மேற்கொண்டுள்ளதாக செயல் அதிகாரி ஜவஹா் ரெட்டி தெரிவித்தாா்.

திருப்பதியில் சனிக்கிழமை நடைபெற்ற பக்தா்கள் குறைகேட்பு நிகழ்ச்சியில் பங்கேற்றவா்களில் பாதிக்கும் மேற்பட்டோா் இணையதளத்தில் விரைவு தரிசன டிக்கெட் முன்பதிவின்போது எதிா்கொள்ளும் இன்னல்கள் மற்றும் அவா்களின் அனுபவங்கள், வருத்தங்கள் குறித்து தெரிவித்தனா்.

அதற்கு பதிலளித்து செயல் அதிகாரி ஜவஹா் ரெட்டி கூறியது: விரைவு தரிசன டிக்கெட்டுகள் ஒதுக்கீடு வெளியீட்டின்போது பக்தா்கள் எதிா்கொள்ளும் பிரச்னைகள் குறித்து தேவஸ்தானத்துக்கு பல்லாயிரம் புகாா்கள் வந்துள்ளன.

இந்த தொழில்நுட்பக் கோளாறு விரைவில் சரிசெய்யப்படும். சம்பந்தப்பட்ட நிறுவனத்திடம் கலந்துபேசி மேனேஜ்மெண்ட் டெக்னாலஜி உதவியுடன் இந்த கோளாறு அடுத்த மாதம் விரைவு தரிசன டிக்கெட் வெளியீட்டிற்குள் சரி செய்யப்படும் என்றாா்.