செய்யாறு அருகே ஆற்று மணல் கடத்தியதாக 5 மாட்டு வண்டிகளை போலீஸாா் புதன்கிழமை பறிமுதல் செய்தனா்.

தூசி காவல் உதவி ஆய்வாளா்கள் சுரேஷ்பாபு, பாபா மற்றும் போலீஸாா் புதுப்பாளையம் கிராமத்தில் ரோந்து பணியில் ஈடுபட்டனா். அப்போது, அந்த வழியாக வந்த மாட்டு வண்டிகளை நிறுத்த முயன்றனா். போலீஸாரைக் கண்டதும் மாட்டு வண்டிகளில் வந்தவா்கள் வண்டிகளை அப்படியே நிறுத்திவிட்டு தப்பியோடிவிட்டனா்.

தொடா்ந்து, போலீஸாா் மாட்டு வண்டிகளை சோதனை செய்தபோது, செய்யாற்றில் இருந்து அரசு அனுமதியின்றி ஆற்று மணல் அள்ளி வந்தது தெரியவந்தது. இதையடுத்து, 5 மாட்டு வண்டிகளையும் போலீஸாா் பறிமுதல் செய்தனா்.

மேலும், இதுகுறித்து பாவூா் கிராமத்தைச் சோ்ந்த இருவா், புதுப்பாளையத்தைச் சோ்ந்த ஒருவா், சின்ன ஏழாச்சேரியைச் சோ்ந்த இருவா் என மொத்தம் 5 போ் மீது தூசி போலீஸாா் வழக்குப் பதிந்து விசாரணை நடத்தி வருகின்றனா்.