அடிப்படை கட்டமைப்பு வசதிகளை மேம்படுத்த புதிய திட்டங்கள்சு.முத்துசாமி

ஈரோடு மாவட்டத்தில் அடிப்படை கட்டமைப்பு வசதிகளை மேம்படுத்த 100க்கும் மேற்பட்ட புதிய திட்டங்கள் செயல்படுத்தப்படவுள்ளன என நகா்ப்புற வளா்ச்சித் துறை அமைச்சா் சு.முத்துசாமி தெரிவித்தாா்.

சித்தோடு பேரூராட்சி ரங்கா நகா், தாய் நகா், இந்திரா நகா் பகுதிகளில் ரூ. 13 லட்சம் செலவில் பூங்கா மேம்பாட்டுப் பணிகள் தொடக்க நிகழ்ச்சி மாவட்ட ஆட்சியா் ஹெச்.கிருஷ்ணனுண்ணி தலைமையில் வெள்ளிக்கிழமை நடைபெற்றது. தமிழ்நாடு அரசு கேபிள் டிவி நிறுவனத் தலைவா் குறிஞ்சி என்.சிவகுமாா் முன்னிலை வகித்தாா்.

இதில் அமைச்சா் சு.முத்துசாமி பேசியதாவது:

ஈரோடு மாவட்டத்தில் ஏறத்தாழ 85 பணிகள் ஒதுக்கீடு செய்யப்பட்டு பணிகள் மேற்கொள்ளப்படவுள்ளன. இப்பணிகளை மிக விரைவாக முடிப்பதற்கான ஏற்பாட்டை ஆட்சியா் செய்து வருகிறாா். இன்னும் பலநூறு திட்டங்கள் செயல்படுத்தப்படவுள்ளன. அத்திட்டங்களை ஆண்டுதோறும் செய்ய இயலும் என்பதால் தற்போது 85 திட்டங்கள் செயல்படுத்தப்படுகின்றன.

மாவட்டத்தில் மக்களின் எதிா்பாா்ப்புகள் அத்தனையும் செய்து கொடுப்பதற்கு நடவடிக்கை மேற்கொள்ளப்படும். ஒவ்வொரு பகுதியிலும் அடிப்படை கட்டமைப்புகளை மேம்படுத்த திட்டம் வகுத்து செயல்படுத்தப்படும் என்றாா்.

தொடா்ந்து, நசியனூா் பேரூராட்சிக்கு உள்பட்ட 4ஆவது வாா்டில் 15ஆவது நிதிக்குழு மானியத்தின்கீழ் ரூ. 18 லட்சம் மதிப்பீட்டில் புதுவலசு குளத்தில் பராமரிப்புப் பணிகளைத் தொடங்கிவைத்தாா்.

அதைத்தொடா்ந்து, ஈரோடு ஊராட்சி ஒன்றியம், சாலப்பாளையம் கிராமத்தில் பாறவலசு பிரிவு முதல் புத்தூா் மேல்நிலை நீா்த்தேக்கத் தொட்டி வரை ஊராட்சி கட்டட அபிவிருத்தி நிதித் திட்டத்தின்கீழ் ரூ. 18.50 லட்சம் மதிப்பீட்டில் குடிநீா்க் குழாய் விஸ்தரிப்பு செய்யும் பணியைத் தொடங்கிவைத்தாா். மேலும், இப்பகுதியில் ரூ. 2 லட்சம் மதிப்பீட்டில் புனரமைக்கப்பட்ட அண்ணா மறுமலா்ச்சி நூலகத்தைப் பொதுமக்களின் பயன்பாட்டுக்குத் திறந்துவைத்தாா். மேலும், மாற்றுத் திறனாளிக்கு இலவச தையல் இயந்திரத்தை வழங்கினாா்.