பெருந்துறை ஒன்றியம் கிரே நகரில் அமைந்துள்ள அத்திக்கடவு - அவிநாசி திட்டத்தின் 4ஆவது நீரேற்று நிலையத்தை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் வெள்ளிக்கிழமை நேரில் ஆய்வு செய்தாா்.

ஈரோடு மாவட்டம், பெருந்துறை ஒன்றியம், கிரே நகரில் அமைந்துள்ள அத்திக்கடவு -அவிநாசி திட்டத்தின் 4ஆம் நீருந்து நிலையத்திலிருந்து அருகாமையில் உள்ள குளங்களுக்கு நீா் செல்லும் சோதனை ஓட்டப் பணியை அமைச்சா் மு.பெ.சாமிநாதன் வெள்ளிக்கிழமை நேரில் ஆய்வு செய்தாா். பின்னா் செய்தியாளா்களிடம் அவா் கூறியதாவது: அத்திக்கடவு - அவிநாசி திட்டமானது பவானி ஆற்றில் காளிங்கராயன் அணைக்கட்டின் கீழ்புறத்தில் இருந்து ஆண்டொன்றுக்கு 1.50 டிஎம்சி உபரி நீரை கோவை, திருப்பூா் மற்றும் ஈரோடு ஆகிய மாவட்டங்களில் 24,468 ஏக்கா் நிலம் பயன்பெறும் வகையில் வடிவமைக்கப்பட்டுள்ளது. இத்திட்டத்தில் 32 பொதுப் பணித்துறை ஏரிகள், 42 ஊராட்சி ஒன்றிய ஏரிகள் மற்றும் 971 குளம், குட்டைகளில் நீா் நிரப்பப்பட உள்ளது. இந்தத் திட்டத்தில் தற்போது 99 சதவீத பணிகள் முடிக்கப்பட்டுள்ளன.

இத்திட்டத்துக்கு இதுவரை ரூ. 1624.73 கோடி செலவிடப்பட்டுள்ளது. 2023 பிப்ரவரி 20 முதல் சோதனை ஓட்டம் தொடங்கப்பட்டு தற்போது வரை 6 நீரேற்று நிலையங்கள் மற்றும் பிரதானக் குழாய்களில் சோதனை ஓட்டம் முடிக்கப்பட்டுள்ளது. மேலும், நீரேற்று நிலையங்களுக்கு இடையிலுள்ள கிளைக் குழாய்கள் மற்றும் 1045 குளம், குட்டைகளில் பொருத்தப்பட்டுள்ள கருவிகளில் சோதனை ஓட்டம் நடைபெற்று வருகிறது. அனைத்துப் பணிகளும் விரைவாக முடித்து பொதுமக்கள் பயன்பாட்டுக்கு கொண்டுவர நடவடிக்கை மேற்கொள்ளப்பட்டு வருகிறது என்றாா்.

ஆய்வின்போது, திருப்பூா் மாவட்ட ஆட்சியா் கிறிஸ்துராஜ், ஈரோடு ஆட்சியா் ராஜகோபால் சுன்கரா மற்றும் துறை சாா்ந்த அலுவலா்கள் உடன் இருந்தனா்.