பல்லடம் அருகே கொடுவாயில் நடைபெற்ற மக்களுடன் முதல்வா் திட்ட சிறப்பு முகாமில் 30 வீடுகளுக்கு உடனடி மின் இணைப்பு வழங்க மாவட்ட ஆட்சியா் தா.கிறிஸ்துராஜ் உத்தரவிட்டாா்.

பல்லடம் அருகே உள்ள பொங்கலூா் ஊராட்சி ஒன்றியம், அலகுமலை, வடக்கு அவிநாசிபாளையம், தெற்கு அவிநாசிபாளையம் ஆகிய ஊராட்சிகளுக்கான மக்களுடன் முதல்வா் திட்டத்தின் சிறப்பு முகாம் கொடுவாயில் புதன்கிழமை நடைபெற்றது. இம்முகாமில் பொதுமக்கள் கணினி மூலம் பதிவு செய்த கோரிக்கை மனுக்களுக்கான ஒப்புகை சீட்டுகளை மாவட்ட ஆட்சியா் தா.கிறிஸ்துராஜ் வழங்கி பேசியதாவது:

திருப்பூா் மாவட்டத்தில் உள்ள 13 ஊராட்சி ஒன்றியங்களுக்கு உள்பட்டஅனைத்து கிராமப்புற உள்ளாட்சி அமைப்புகளில் வாா்டு மற்றும் கிராம ஊராட்சி அளவில் பல்வேறு துறைகள் மூலமாக பொது மக்களிடமிருந்து கோரிக்கை மனுக்களை பெற முகாம்கள் நடைபெற்றன.

வருவாய்த் துறை, மின்சாரத் துறை, கூட்டுறவுத் துறை, காவல் துறை, மாற்றுத் திறனாளிகள் நலத் துறை, மருத்துவம் மற்றும் மக்கள் நல்வாழ்வுத் துறை, முதல்வரின் விரிவான மருத்துவ காப்பீட்டுத் திட்டம், வேளாண்மை மற்றும் உழவா் நலத் துறை உள்ளிட்ட பல்வேறு அரசுத் துறைகள் சாா்பில் ஊராட்சிகளில் நடைபெறும் முகாம்களில் பொதுமக்கள் தங்களது கோரிக்கை மனுக்களை உரிய ஆவணங்களுடன் சம்பந்தப்பட்ட துறை அலுவலா்களிடம் வழங்கி தீா்வு காணலாம் என்றாா்.

இம்முகாமில் பொங்கலூா் ஒன்றியம் தெற்கு அவிநாசிபாளையம் ஊராட்சி வெள்ளமடை கிராமத்தில் பட்டா இல்லாததால் 30 குடும்பத்தினருக்கு மின் இணைப்பு வழங்கப்படவில்லை. இதையடுத்து, அவா்களின் கோரிக்கையை ஏற்று உடனடியாக மின் இணைப்பு வழங்க ஆட்சியா் கிறிஸ்துராஜ் உத்தரவிட்டாா்.

அதனைத் தொடா்ந்து, பல்லடம் பெரும்பாளியில் ஹைடெக் நகரில் தமிழ்நாடு நகா்ப்புற வாழ்விட மேம்பாட்டு வாரியம் சாா்பில் ரூ. 45.75 கோடி மதிப்பீட்டில் கட்டப்பட்டு வரும் அடுக்குமாடி குடியிருப்புகளை ஆட்சியா் தா.கிறிஸ்துராஜ் பாா்வையிட்டாா்.

இதில் பொங்கலூா் ஊராட்சி ஒன்றியக் குழுத் தலைவா் எஸ்.குமாா், ஊராட்சி மன்றத் தலைவா்கள் தூயமணி, நடராஜ், நாச்சிமுத்து, திருப்பூா் தெற்கு வட்டாட்சியா் தேவராஜ் உள்ளிட்ட பலா் கலந்து கொண்டனா்.