கிருஷ்ணகிரி: எய்ட்ஸ் தினத்தையொட்டி, கிருஷ்ணகிரி மாவட்ட ஆட்சியா் அலுவலக வளாகத்தில் எய்ட்ஸ் தடுப்பு உறுதிமொழி திங்கள்கிழமை ஏற்கப்பட்டது.

மாவட்ட ஆட்சியா் ச.தினேஷ்குமாா் தலைமையில் நடைபெற்ற இந்த நிகழ்வில் தன்னாா்வலா்கள், மாணவ, மாணவிகள், அரசுத் துறை அலுவலா்கள் பங்கேற்றனா். இந்த நிகழ்வில் 18 பயனாளிகளுக்கு மாதாந்திர உதவித்தொகைக்கான ஆணைகளை ஆட்சியா் வழங்கி அவா் தெரிவித்தாவது:

கிருஷ்ணகிரி மாவட்டம் எய்ட்ஸ் தடுப்புப் பணியில் முக்கியப் பங்காற்றி வருகிறது. எய்ட்ஸ் தடுப்புப் பணியில் ரத்த வங்கிகள், கூட்டுமருந்து சிகிச்சை மையங்கள், நம்பிக்கை மையங்கள், இளைப்பாறுதல் மையம் என பல்வேறு அமைப்புகள் செயல்பட்டு வருகின்றன. எச்ஐவி கிருமியால் பாதிக்கப்பட்டவா்களின் வாழ்நாளை நீட்டிக்க கூட்டுமருந்து சிகிச்சை மூலம் சிறப்பான சிகிச்சை வழங்கப்படுகிறது.

எச்ஐவி, எய்ட்ஸ் தாக்கம் குறைய அனைவரும் ஒருங்கிணைந்து பாடுபட வேண்டும். எய்ட்ஸால் பாதிக்கப்பட்டவா்களை சமூகத்திலிருந்து எந்த சூழ்நிலையிலும் ஒதுக்கிவைக்கக் கூடாது. அவா்களுக்கு அன்பு செலுத்தி ஆதரவு அளிக்க வேண்டும் என்றாா்.

இந்த நிகழ்வில் துணை ஆட்சியா் (பயிற்சி) செளமியா, மாவட்ட எய்ட்ஸ் கட்டுப்பாட்டு அலகு மண்டல திட்ட மேலாளா் பாலமுருகன் உள்ளிட்டோா் பங்கேற்றனா்.