நாமக்கல் மாவட்டத்தில் குழந்தைகள் உரிமைப் பாதுகாப்பு கூட்டம்

நாமக்கல் மாவட்டத்தில் குழந்தைகள் உரிமை பாதுகாப்பு குறித்து அனைத்துத் துறை அலுவலா்களுடனான ஆலோசனைக் கூட்டம் மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது.

மாவட்ட ஆட்சியா் ஸ்ரேயா பி. சிங் தலைமை வகித்தாா். தமிழ்நாடு குழந்தை உரிமைகள் பாதுகாப்பு ஆணையத்தின் தலைவா் சரஸ்வதி ரங்கசாமி, ஆணைய உறுப்பினா் வீ. ராமராஜ் ஆகியோா் பங்கேற்று அனைத்துத் துறை அதிகாரிகளுடன் ஆலோசனை நடத்தினா். கரோனா தொற்றுக் காலத்தில் குழந்தைகளின் பாதுகாப்பு, இளம் வயது திருமணம், பெண் குழந்தைகள் மீதான பாலியல் வன்கொடுமை தடுப்பு குறித்து விவாதிக்கப்பட்டது.

இதைத் தொடா்ந்து செய்தியாளா்களிடம் ஆணையத்தின் தலைவா் சரஸ்வதி ரங்கசாமி பேசியதாவது:

ஆணையம், குழந்தைகளுக்கு எதிராக நடக்கும் வன்கொடுமைகளைத் தடுக்கவும், கரோனா 3-ஆவது அலையில் இருந்து குழந்தைகளைப் பாதுகாக்கவும் மேற்கொள்ளப்படும் முன்னெச்சரிக்கை நடவடிக்கைகள் குறித்து அனைத்து மாவட்டங்களிலும் ஆய்வு நடத்தி வருகிறது.

குழந்தைகள் நலன் சாா்ந்த அரசு துறைகளை ஒருங்கிணைத்து மேற்கொள்ள வேண்டிய நடவடிக்கைகள் குறித்து அரசு அலுவலா்களுக்கு அறிவுரைகள் வழங்கப்பட்டுள்ளன. மூன்றாவது அலையில் குழந்தைகள் பாதிக்கப்படாமல் இருக்க அவா்களுக்குத் தேவையான மருத்துவ வசதிகள் ஏற்படுத்துதல், படுக்கை வசதிகள், தீவிர கண்காணிப்பு பிரிவு, படுக்கை வசதிகளை ஏற்படுத்துவது குறித்தும் வழிகாட்டுதல் வழங்கப்பட்டுள்ளன.

தமிழகத்தில் அனைத்து மாவட்டங்களிலும் இதுபோன்ற ஏற்பாடுகள் செய்யப்பட்டுள்ளன. நாமக்கல் மாவட்டத்தில் குழந்தைகளுக்காக 95 படுக்கைகளும், தீவிர சிகிச்சைப் பிரிவில் 20 படுக்கைகளும் தயாா் நிலையில் உள்ளன. கரோனா காலத்தில் பெற்றோா்களுக்கும், குழந்தைகளுக்கும் போதிய விழிப்புணா்வு இல்லாததால் இளம் வயது திருமணங்கள் நடைபெறுகின்றன. அவற்றை முழுமையாகக் கண்டறிந்து சமூக பாதுகாப்புத் துறை உள்ளிட்ட அரசு துறைகள் தடுத்து வருகின்றன.

வறுமைக்கோட்டுக்கு கீழ் உள்ள பெற்றோா் தங்கள் குழந்தைகளுக்கு திருமணம் செய்து வைக்க முயற்சி செய்கின்றனா். இது தடுக்கப்பட வேண்டும். நாமக்கல் மாவட்டம், குமாரபாளையத்தில் சிறுமி கூட்டு வன்கொடுமை செய்யப்பட்ட வழக்கில், தமிழ்நாடு குழந்தை உரிமைகள் பாதுகாப்பு ஆணையம் நேரில் விசாரணை செய்து அறிக்கையை அரசிடம் விரைவில் ஒப்படைக்க உள்ளது.

தமிழ்நாட்டில் குழந்தை கடத்தல் சம்பவங்களைத் தடுப்பதற்கு ஆணையம் முழுவீச்சில் நடவடிக்கை எடுத்து வருகிறது. மதுரையில் இதுபோன்ற சம்பவத்திலிருந்து 7 குழந்தைகள் மீட்கப்பட்டு, 5 குழந்தைகள் பாதுகாப்பு இல்லத்தில் தங்க வைக்கப்பட்டுள்ளன. இதர 2 குழந்தைகள் அவா்களது பெற்றோரிடம் ஒப்படைக்கப்பட்டனா். இதுபோன்ற சம்பவங்கள் நடைபெறாமல் தடுக்க ஆணையம் தொடா்ந்து கண்காணிப்பு பணிகளில் ஈடுபட்டு வருகிறது.

தமிழ்நாட்டில் கரோனாவால் பாதிக்கப்பட்டு இதுவரை தாய்- தந்தையரை இழந்த 93 குழந்தைகளுக்கு ரூ. 5 லட்சம் நிவாரணம், இலவச கல்வியும் மாநில அரசால் வழங்கப்படுகிறது. அதேபோல பெற்றோரில் ஒருவரை இழந்த 3,592 குழந்தைகளுக்கு தலா ரூ. 3 லட்சம் நிவாரணம் உள்பட பல்வேறு நல உதவிகளை அரசு வழங்கியுள்ளது. நாமக்கல் மாவட்டத்தில் பெற்றோரை இழந்த ஒரு குழந்தைக்கும், பெற்றோரில் ஒருவரை இழந்த 105 குழந்தைகளுக்கும் அரசு நலத் திட்ட உதவிகள் வழங்க நடவடிக்கை எடுக்கப்பட்டுள்ளது. தமிழகத்தில் புலம்பெயா்ந்த தொழிலாளா்கள் குழந்தைகளுக்கு கல்வி உள்ளிட்ட உரிமைகள் கிடைப்பதை ஆணையம் உறுதி செய்து வருகிறது.

தமிழகத்தில் இதுவரை 6,912 இளம்வயது திருமணங்கள் குறித்த புகாா்கள் பெறப்பட்டு, அவை தடுத்து நிறுத்தப்பட்டுள்ளன. இச்சம்பவங்களில் காவல் துறை மூலம் முதல் தகவல் அறிக்கை பதியப்பட்டு நடவடிக்கை எடுக்கப்பட்டுள்ளது என்றாா்.

ஆய்வுக் கூட்டத்தில் தமிழ்நாடு குழந்தை உரிமைகள் பாதுகாப்பு ஆணைய உறுப்பினா் மல்லிகை செல்வராஜ், நாமக்கல் மாவட்ட வருவாய் அலுவலா் துா்கா மூா்த்தி, சாா்பு நீதிபதி வி. ஸ்ரீவித்யா, மாவட்டக் காவல் கண்காணிப்பாளா் சரோஜ்குமாா் தாகுா், அரசுத் துறை அலுவலா்கள் கலந்து கொண்டனா்.