ராசிபுரம் புதிய அரசு மருத்துவமனை கட்டடப் பணிகள் ஆய்வு

ராசிபுரம் புதிய அரசு மருத்துவமனை கட்டட கட்டுமானப் பணி, போதமலைக்கு தாா்சாலை வசதி மேற்கொள்ளப்பட்டு வருவதை, மாவட்ட கண்காணிப்பு அலுவலா் மு.ஆசியா மரியம் புதன்கிழமை ஆய்வு செய்தாா்.

நாமக்கல் மாவட்டம், ராசிபுரம், புதுச்சத்திரம், பட்டணம், வெண்ணந்தூா் உள்ளிட்ட பகுதிகளில் ரூ. 1,061 கோடி மதிப்பீட்டில் மேற்கொள்ளப்பட்டு வரும் பல்வேறு வளா்ச்சித் திட்டப் பணிகள் குறித்து மாவட்ட ஆட்சியா் ச.உமா முன்னிலையில், தமிழக சிறுபான்மையினா் நலத்துறை இயக்குநரும், மாவட்ட கண்காணிப்பு அலுவலருமான மு.ஆசியா மரியம் புதன்கிழமை நேரடியாக ஆய்வு மேற்கொண்டாா்.

நவணி தோட்டக்கூா்பட்டி ஊராட்சி ஒன்றிய தொடக்கப் பள்ளியில் முதலமைச்சரின் காலை உணவுத் திட்டம், புதுச்சத்திரத்தில் முன்னாள் முதல்வா் டாக்டா் ப.சுப்பராயனுக்கு நினைவு அரங்கம் கட்டுமானப் பணி, அங்குள்ள ஆரம்ப சுகாதார நிலையம் உள்ளிட்டவற்றை அவா் ஆய்வு செய்தாா். மேலும், ராசிபுரம் வட்டம், அணைபாளையத்தில் ரூ. 53.39 கோடியில் மாவட்ட அரசு தலைமை மருத்துவமனை 6 தளங்களுடன், 300 படுக்கை வசதிகளுடன் கட்டப்பட்டு வருவதையும், புதிய பேருந்து நிலையம் அமையவுள்ள இடம், ரூ. 854.37 கோடியில் ராசிபுரம் கூட்டுக் குடிநீா் திட்டப் பணிகளையும் கண்காணிப்பு அலுவலா் ஆய்வு மேற்கொண்டு, சம்பந்தப்பட்ட துறை அதிகாரிகள், ஒப்பந்ததாரா்களிடம் பணியின் தன்மை குறித்தும், குறிப்பிட்ட காலத்தில் முடிக்கவும் அறிவுறுத்தினாா்.

கோனேரிப்பட்டியில் நுகா்பொருள் வாணிபக் கழக கிடங்கில் உணவுப் பொருள்களின் இருப்பு குறித்தும், கோனேரிப்பட்டியில் மகளிா் சுயஉதவிக் குழுவினா் இரும்பு கேபிள் தயாரிக்கும் பணிகளையும் பாா்வையிட்டாா். பட்டணம் பேரூராட்சியில் அமைந்துள்ள பசுமைப் பூங்கா, அறிவுசாா் மையம், நூலகம், வெண்ணந்தூா் ஒன்றியம், வடுகம் தொடக்க வேளாண்மை கூட்டுறவு கடன் சங்க நியாயவிலைக் கடையில் பொது விநியோகப் பொருள்களின் இருப்பு, விற்பனை விவரம் உள்ளிட்டவை குறித்து ஆய்வு மேற்கொண்டாா்.

போதமலைக்கு ரூ. 105.35 கோடியில் கீழூா், மேலூா், கெடமலையை இணைக்கும் வகையில் 31 கி.மீ. தொலைவுக்கு சாலை அமைக்கும் பணிகள் நடைபெற்று வருவதை பாா்வையிட்டாா். ராசிபுரத்தில் மிகவும் பிற்பட்டோா் நல கல்லூரி விடுதியை ஆய்வு செய்து, மாணவிகளுடன் அவா் கலந்துரையாடினாா்.

இந்த ஆய்வின் போது, மாவட்ட வருவாய் அலுவலா் ரெ.சுமன், மாவட்ட ஊரக வளா்ச்சி முகமை திட்ட இயக்குநா் சு.வடிவேல், முதன்மை கல்வி அலுவலா் ப.மகேஸ்வரி, மகளிா் திட்ட இயக்குநா் கு.செல்வராசு, சுகாதாரப் பணிகள் மாவட்ட நல அலுவலா் க.பூங்கொடி, மாவட்ட வழங்கல் அலுவலா் த.முத்துராமலிங்கம் உள்பட துறை சாா்ந்த அலுவலா்கள் உடனிருந்தனா்.