நாமக்கல்: பள்ளி, கல்லூரிகளில் போதைப்பொருள்கள் புழக்கத்தை கண்காணிக்க எடுக்க வேண்டும் என மாவட்ட ஆட்சியா் துா்காமூா்த்தி வலியுறுத்தினாா்.

நாமக்கல் மாவட்ட அளவில் பள்ளி, கல்லூரி மாணவா்களுக்கான போதைப் பொருள்கள் எதிா்ப்பு விழிப்புணா்வு நிகழ்ச்சி, நாமக்கல் அரசு மருத்துவக் கல்லூரி கலையரங்கில் செவ்வாய்க்கிழமை நடைபெற்றது. இந்நிகழ்வை ஆட்சியா் துா்காமூா்த்தி தொடங்கி வைத்து பேசியதாவது:

தற்போது, பள்ளி, கல்லூரி மாணவா்கள் ‘கூல்லிப்’ என்ற புகையிலையை பயன்படுத்துகின்றனா். இது உடலுக்கு மிகவும் தீங்கு விளைவிக்கும். புற்றுநோய், இதய நோய், நுரையீரல் கோளாறுகள் போன்ற நீண்டகால உடல்நலப் பிரச்னைகளை ஏற்படுத்தும்.

நாமக்கல் மாவட்டத்தில் போதைப்பொருள்கள் மற்றும் தடைசெய்யப்பட்ட புகையிலைப் பொருள்களின் பயன்பாட்டை தவிா்க்க மாவட்ட நிா்வாகம் பல்வேறு நடவடிக்கைகளை எடுத்து வருகிறது. மாவட்டத்தில் உள்ள அனைத்து வகை பள்ளிகளிலும் 371 போதைப்பொருள் தடுப்பு மன்றங்கள், கல்லூரிகளில் 138 போதைப்பொருள் தடுப்பு மன்றங்கள், 40 என்சிசி குழுக்கள், 182 என்எஸ்எஸ் குழுக்கள் தொடங்கப்பட்டு தொடா்ச்சியாக விழிப்புணா்வு ஏற்படுத்தப்பட்டு வருகிறது.

அனைத்து கல்வி நிறுவனங்களின் அருகில் உள்ள கடைகளில் தொடா்ச்சியாக கூட்டுத்தணிக்கை செய்து போதைப்பொருள்கள் பறிமுதல் செய்யப்படுகின்றன. கூல்லிப், ஹான்ஸ் போன்ற புகையிலைப் பொருள்களை யும், தடைசெய்யப்பட்ட பிற பொருள்களையும் ஒருபோதும் பயன்படுத்த வேண்டாம். புகையிலை பொருள்கள் முழு வாழ்க்கையையும் கெடுத்துவிடும். அவை, உங்கள் கல்வி, உடல் செயல்பாடுகள், ஆரோக்கியத்தை பாதிக்கக்கூடும். பெற்றோரும், ஆசிரியா்களும் மாணவா்களுக்கு உதவிட வேண்டும்.

போதைப்பொருள்கள் பழக்கத்தை, புழக்கத்தை பள்ளி, கல்லூரிகளுக்குள் வரவிடாமல் தடுக்க வேண்டும்.

போதைப் பழக்கத்தில் இருந்து விடுபட 14416 மற்றும் 1800112356 என்ற இலவச எண் மூலம் ஆலோசனைகளை பெற்று அந்த பழக்கத்தை விட்டுவிட முடியும். தடைசெய்யப்பட்ட புகையிலை பொருள்கள் குறித்து புகாரளிக்க, கட்டணமில்லா எண்: 10581-ஐ அழைக்கலாம். வாட்ஸ்ஆப் 94981- 10581 எண்ணுக்கு குறுஞ்செய்தி அனுப்பலாம் என்றாா்.

முன்னதாக, போதைப் பழக்கத்திற்கு எதிரான உறுதிமொழியை அனைவரும் ஏற்றுக் கொண்டனா். மேலும், விழிப்புணா்வு கையொப்ப இயக்கத்தை

ஆட்சியா் தொடங்கிவைத்தாா். இதில், மாவட்ட காவல் கண்காணிப்பாளா் எஸ்.விமலா, சாா்பு நீதிபதி ஜி.கே.வேலுமயில், உதவி ஆணையா் (கலால்) என்.எஸ்.ராஜேஷ்குமாா், மண்டல இணை இயக்குநா் (கல்லூரி கல்வி இயக்ககம், தருமபுரி) ராமலட்சுமி, முதன்மைக் கல்வி அலுவலா் ஏ.எஸ்.எழிலரசி, மாவட்ட தொடா்பு அலுவலா் (போதைப்பொருள் எதிா்ப்பு மன்றம்) சி.ஆா்.ராஜேஷ்கண்ணன், கலால் வட்டாட்சியா் ஆா்.சீனிவாசன், மனநல மருத்துவா் இந்துமதி உள்ளிட்ட பலா் கலந்துகொண்டனா்.