சேலத்தில் இருந்து திருச்சிக்கு சிறப்புப் பயணிகள் ரயில் வரும் பிப்ரவரி 5 ஆம் தேதி முதல் இயக்கப்பட உள்ளது.
சேலத்தில் இருந்து திருச்சிக்கு பயணிகள் ரயில் இயக்க வேண்டும் என சேலம், நாமக்கல் மாவட்ட பயணிகள் கோரிக்கை விடுத்து வந்தனர்.
இதை பரிசீலித்த சேலம் ரயில்வே கோட்டம், திருச்சி - கரூர் பயணிகள் ரயிலை சேலம் வரை நீட்டித்து உத்தரவிட்டுள்ளது. இந்த ரயில் பிப்ரவரி 5 ஆம் தேதி முதல் பரீட்சார்த்த முறையில் 3 மாதங்களுக்கு இயக்கப்பட உள்ளது.
பயணிகளின் கூட்டத்தைப் பொறுத்து தொடர்ந்து இயக்கப்பட உள்ளது. திருச்சியில் இருந்து வண்டி எண் 76833 திருச்சி - கரூர் பயணிகள் ரயில் திருச்சியில் காலை 9.35 மணிக்கு புறப்பட்டு கரூருக்கு 11.35 மணிக்கு வந்து சேருகிறது. பின்னர் அங்கிருந்து வண்டி எண் 06833 கரூர் - சேலம் பயணிகள் ரயில், கரூரில் இருந்து 11.40 மணிக்கு
புறப்பட்டு, பகல் 1.20 மணிக்கு சேலம் வந்து சேருகிறது.
அதேபோல வண்டி எண் 06834 சேலம் - கரூர் சிறப்பு பயணிகள் ரயில், சேலத்தில் இருந்து 1.30 மணிக்குப் புறப்பட்டு, 3.20 மணிக்கு கரூர் செல்கிறது. பின்னர் அங்கிருந்து 3.30 மணிக்கு புறப்பட்டு மாலை 5.35 மணிக்கு திருச்சி சென்றடைகிறது.