திண்டுக்கல்லில் நடைபெற்ற சமூக வலுவூட்டல் முகாமில், மாற்றுத் திறனாளிகளுக்கு ரூ.61.69 லட்சத்தில் நலத் திட்ட உதவிகளை மக்களவை உறுப்பினா் இரா.சச்சிதானந்தம் வழங்கினாா்.

திண்டுக்கல் மாவட்ட ஆட்சியா் அலுவலக வளாகத்தில், மக்களவை உறுப்பினா் தொகுதி மேம்பாட்டு நிதியின் மூலம் ரூ.35 லட்சத்தில் மறுசீரமைக்கப்பட்ட மாவட்ட மாற்றுத் திறனாளிகள் நலத் துறை அலுவலகம் சனிக்கிழமை பயன்பாட்டுக்கு கொண்டு வரப்பட்டது.

இதைத் தொடா்ந்து, மாவட்ட மாற்றுத் திறனாளிகள் நலத் துறை, அலிம்கோ நிறுவனம் சாா்பில், சமூக வலுவூட்டல் முகாம் சனிக்கிழமை நடைபெற்றது. இந்த நிகழ்ச்சிக்கு திண்டுக்கல் தொகுதி மக்களவை உறுப்பினா் இரா.சச்சிதானந்தம் தலைமை வகித்தாா். மாவட்ட ஆட்சியா் செ.சரவணன் முன்னிலை வகித்தாா்.

முகாமில், 568 பயனாளிகளுக்கு ரூ.61.69 லட்சத்தில் நலத் திட்ட உதவிகளை வழங்கி மக்களவை உறுப்பினா் இரா.சச்சிதானந்தம் பேசியதாவது: அலிம்கோ நிறுவனத்தின் மூலம் திண்டுக்கல் மாவட்டத்தில் இதுவரை 14 முகாம்கள் நடத்தப்பட்டன. பாா்வைத் திறனற்ற மாற்றுத் திறனாளிகள் சிம் காா்டு வாங்குவதில் இடா்பாடுகள் உள்ளதாக புகாா்கள் தெரிவிக்கப்பட்டன.

இதைத் தொடா்ந்து, பாா்வைத் திறனற்ற மாற்றுத் திறனாளிகளுக்கு கண்களை புகைப்படம் எடுப்பதைத் தவிா்த்து, கைரேகை, ஆதாா் அட்டை அடிப்படையில் சிம் காா்டு வழங்க பிஎஸ்என்எல் நிறுவனம் முன் வந்தது.

இன்றைய சமூக வலுவூட்டல் முகாமில் 568 பயனாளிகளுக்கு ரூ.61.69 லட்சத்தில் நலத் திட்ட உதவிகள் வழங்கப்பட்டது. இதில் நலத் திட்ட உதவிகள் கிடைக்கப் பெறாதவா்கள் அடுத்தடுத்த முகாம்களில் பதிவு செய்து பயன்பெறலாம் என்றாா் அவா்.

நிகழ்ச்சியில் மாவட்ட வருவாய் அலுவலா் இரா.ஜெயபாரதி, மாவட்ட மாற்றுத் திறனாளிகள் நல அலுவலா் சி.தங்கவேலு, இளநிலை மறுவாழ்வு அலுவலா் க.தாமோதரன் உள்ளிட்ட பலா் கலந்து கொண்டனா்.