நீதிமன்ற பெண் ஊழியரிடம் பாலியல் அத்துமீறலில் ஈடுபட்ட வழக்குரைஞா் மீது வழக்குப் பதிவு செய்ய, சென்னை உயா் நீதிமன்ற மதுரை கிளை உத்தரவிட்டுள்ளது.

வழக்குரைஞா் எஸ்.ராமநாதன் தாக்கல் செய்த மனுவை விசாரித்த நீதிபதி ஜி.ஆா். சுவாமிநாதன் பிறப்பித்த உத்தரவு: ராமநாதபுரம் மாவட்டத்தில் உள்ள நீதிமன்றத்தில் பணியாற்றும் பெண் ஊழியருக்கு, வழக்குரைஞா் ஒருவா் பாலியல் தொந்தரவு அளித்துள்ளாா். நீதிமன்ற வளாகத்தில் பணியிலிருந்த ஊழியருக்கு ஏற்பட்ட பாதிப்பு குறித்து, மாவட்ட முதன்மை நீதிபதியின் அறிக்கை பெறப்பட்டது.

சம்பந்தப்பட்ட வழக்குரைஞா் தனக்கு தொல்லை கொடுப்பதால், வேறு நீதிமன்றத்துக்கு இடமாறுதல் அளிக்குமாறு, பெண் ஊழியா் மாவட்ட முதன்மை நீதிபதியிடம் மனு அளித்துள்ளாா். அவரது கோரிக்கை ஏற்கப்பட்டு இடமாற்றம் அளிக்கப்பட்டுள்ளது. மேலும், அவரது கோரிக்கையை ஏற்று மேல்நடவடிக்கை எடுக்கப்படாமல், அவரது மனு முடித்து வைக்கப்பட்டுள்ளது என அறிக்கையில் மாவட்ட முதன்மை நீதிபதி தெரிவித்திருக்கிறாா்.

இந்த குற்றச்சாட்டானது பெண் ஊழியரின் பாதுகாப்பு மற்றும் நீதிமன்றத்தின் மாண்பு தொடா்புடையது. இவ்விஷயத்தில் பாதிக்கப்பட்ட நபா் மேல்நடவடிக்கையை விரும்பவில்லை என்பதற்காக, நீதிமன்றம் கண்களை மூடிக்கொள்ள முடியாது. பணி நேரத்தில் பெண் ஊழியரிடம், மது போதையில் இருந்த வழக்குரைஞா் தவறாக நடக்க முயன்றுள்ளாா். சிசிடிவி கேமராவில் பதிவாகியுள்ள இந்த சம்பவம் பெண்கள் வன்கொடுமைத் தடுப்புச் சட்டத்தின் கீழ் குற்றமாகும். எனவே, மனுதாரரின் புகாரின்பேரில் போலீஸாா் வழக்குப் பதிவு செய்து நடவடிக்கை எடுக்கவேண்டும்.

மேலும், சம்பந்தப்பட்ட வழக்குரைஞா் மீது ஒழுங்கு நடவடிக்கை எடுக்க, தமிழ்நாடு பாா் கவுன்சிலுக்கு மாவட்ட முதன்மை நீதிபதி பரிந்துரைக்க வேண்டும். புகாா் தொடா்பான சிசிடிவி கேமரா பதிவை பாா் கவுன்சில் மற்றும் காவல் துறையினருக்கு வழங்கவேண்டும் என அந்த உத்தரவில் தெரிவித்துள்ளாா்.