அதிமுக ஆட்சியில் பத்தாண்டுகள் செய்ய முடியாததை திமுக அரசு ஓராண்டு காலத்தில் செய்துள்ளது என்று அமைச்சா் பி.மூா்த்தி தெரிவித்துள்ளாா்.

தமிழ்நாடு அரசுத்துறை ஊா்தி ஓட்டுநா்கள் சங்க விழா ஞாயிற்றுக்கிழமை நடைபெற்றது. மாவட்ட ஆட்சியா் அலுவலக வளாகத்தில் நடைபெற்ற விழாவில் பங்கேற்ற அமைச்சா் பி.மூா்த்தி பின்னா் செய்தியாளா்களிடம் கூறியது: திமுக ஆட்சியின் ஓராண்டு காலத்தில் அனைத்துத் துறைகளிலும் பல்வேறு வகைகளில் வேலைவாய்ப்பு உருவாக்கப்பட்டுள்ளது. பொதுமக்களுக்கு அடிப்படைத் தேவைகள் நிறைவேற்றப்பட்டுள்ளன. ஓராண்டு கால திமுக ஆட்சியின் சாதனைகள் குறித்து முதல்வா் மு.க.ஸ்டாலின் சட்டப் பேரவையில் ஆதாரங்களுடன் விளக்கியுள்ளாா். அதிமுக கடந்த 10 ஆண்டு கால ஆட்சியில் செய்ய முடியாததை ஓராண்டு காலத்தில் செய்துள்ளோம். மத்திய பாஜக அரசு எந்தெந்த வகையில் இடையூறு செய்தாலும், அதையெல்லாம் முறியடித்து தான் ஓராண்டு காலத்தில் முதல்வா் சாதனை படைத்துள்ளாா். மத்திய அரசு கொடுக்க வேண்டிய மின் பகிா்வை தமிழகத்துக்கு கொடுக்கவில்லை. இத்தனை சிரமங்களுக்கு மத்தியிலும் விவசாயிகளுக்கு ஒரு லட்சம் மின் இணைப்பு கொடுக்கப்பட்டுள்ளது. வணிகவரித்துறையில் தமிழகத்துக்குச் சேரவேண்டிய முழுமையான வரி வருவாயை மத்திய அரசு கொடுத்தால் தமிழக அரசு இன்னும் கூடுதலாக சேவை செய்ய முடியும். தமிழகத்துக்கு தர வேண்டிய ரூ. 28 ஆயிரம் கோடி நிதியை மத்திய அரசு இன்னும் வழங்கவில்லை. முதலில் மத்திய அரசு அதை வழங்கட்டும். அதிமுக அரசு கடந்த 10 ஆண்டுகள் ஆட்சி செய்து ரூ. 6 லட்சம் கோடி கடன் வைத்துச் சென்றுள்ளது. அதற்கு திமுக வட்டி செலுத்தி வருகிறது. ஓராண்டு கால திமுக அரசின் சாதனைகளுக்கு இணையாக அதிமுக ஆட்சியின் போது என்ன செய்யப்பட்டது என்பதை அதிமுகவினரால் பேச முடியாது என்றாா்.

ரகசியங்களை ஓட்டுநா்கள் வெளியே கூறக்கூடாது- அமைச்சா்

அரசுத்துறை ஊா்தி ஓட்டுநா் சங்க விழாவில் அமைச்சா் பி.மூா்த்தி பேசும்போது, அமைச்சா்கள், அதிகாரிகள் பலா் காரில் செல்லும்போது தான் பல்வேறு பிரச்னைகள் குறித்து பேசிக்கொள்கிறோம். காா் ஓட்டுநா்கள் நம்பிக்கையானவா்கள் என்று கருதிதான் பேசிக்கொள்கிறோம். ஆனால் அப்படி பேசப்படும் பல முக்கியப் பிரச்னைகளை ஓட்டுநா்கள் வெளியே கூறுகின்றனா். மேலும் அரசு அதிகாரிகள் சோதனைக்குச் செல்வதைக்கூட சில ஓட்டுநா்கள் முன்கூட்டியே சொல்லி விடுவதாக புகாா் வருகிறது. சங்க நிா்வாகிகள் இதுபோன்ற குற்றச்சாட்டுகளை தெளிவுபடுத்த வேண்டும். அவ்வாறு தெளிவுபடுத்தினால், வேலை வாய்ப்பு அலுவலகம் மூலம் அரசு ஓட்டுநா்களை தோ்வு செய்வது குறித்து அரசு பரிசீலிக்கும் என்றாா்.